Georgia

No. of :

No. of Shares:

Currently viewed by: Marcus Rosit

PAG-ASA: Bagyo mosulod sa Pilipinas Dec. 16 sa hapon

TAGBILARAN CITY, Bohol, Dec. 14 (PIA) -- Gi-isip na nga Severe Tropical Storm (kusog nga bagyo) ang bagyo nga naa pa sa International waters nga gihinganlan og Rai, samtang nagrumbo kini paingon sa amihanang-kasadpan sa iyang posisyon nga anaa sa 1,165 ka kilometro kasubangan sa Mindanao sa 7.3°N, 136.4°E ug gawas pa sa Philippine Area of Responsibility (PAR) ganinang alas 10:00 sa buntag.

Gibana bana nga ang bagyong Rai mosulod sa PAR ug ilhon na nga OdettePH sa Miyerkoles sa hapon ug mahimong unang motikang sa kamad-an sa mga silinganang dapit sa Caraga o sa kasubangang Visayas sa Huwebes sa hapon o gabii, Disyembre 16.

Sa labing uwahi nga weather bulletin sa Philippine Atmospheric Geophysical and Astronomical Services Administration (PAG-ASA), samtang ang Rai aduna pay maximum sustained winds sa 95 kilometros matag oras (km/h) nga hangin duol sa sentro niini, ug kalit-kalit nga paghuros nga moabut sa 115 km/h, ang  pagsulod niini sa PAR mahimong maghatag niini sa may maayong sitwasyon aron mahimo nga mas kusog nga bagyo.

Segun sa PAG-ASA, sa dili pa kini motabok sa yuta, mahimong may gikusgon na kini nga 155 km/h sa Huwebes sa buntag o palis, kanus-a mahimong iisa na ang storm signals sa Kabisay-an, Mindanao ug pipila ka lalawigan sa habagatang Luzon.

Niini, gibutyag sa PAG-ASA nga sa sunod nga 24 oras, mahimong ipakayab na ang Tropical Climate Weather System (TCWS) Signal sa mga kasubangang lalawigan sa Visayas ug Mindanao.

Niini, mapaabut ang hinay, kasarangan ngadto sa kusog nga bunok sa uwan ibabaw sa Caraga ug Davao Oriental, ug ang pag-agi sa bagyo ibabaw sa tunga-tungang bahin sa kapupod-an, magpabunok sa uwan sa Visayas, Mindanao ug habagatang Luzon, nga makaangin sa pagbaha, pagkahunlak sa yuta ug kalit nga paglunop.

Ang bagyo usab gitagna na nga magdala sa mga higanteng bawod sa lawod ubos sa mata sa bagyo  ilabi na sa mga kadagatan sa habagatang Luzon ug Visayas.

Niini, gitambagan na ang mga disaster councils nga mangandam ug maghimo nag mga lakang aron ika-iway ang mga katawhan sa risgo nga takin niining bagyong umaabut.  (RAHC/PIA7 Bohol)

UWANON NGA MISA AGUINALDO. Mahimong uwanon ang misa aguinaldo sa Pilipinas ilabi na sa Kabisay-an ug Mindanao tungod sa paglabay sa bagyo nga Odette. (PIA Bohol/PAG-ASA)

About the Author

Rey Anthony Chiu

Regional Editor

Region 7

Feedback / Comment

Get in touch