Georgia

No. of :

No. of Shares:

Currently viewed by: Marcus Rosit

Odette nagkakusog samtang nagkaduol

Storm Signal No. 1 sa Bohol

TAGBILARAN CITY, Bohol, Dec. 15 (PIA) -- Hangin nga may gikusgon nga molahutay sa 110 kilometros matag oras duol sa sentro ug kalitkalit nga paghuros nga mosapong sa 135 kilometros matag oras ang dala sa bagyo nga Odette karon, segun sa bag-ong weather bulletin sa Philippine Atmospheric Geophysical and Astronomical Services Administration, (PAG-ASA).

Kini gikan sa 100 km/h ug huros nga miabut sa 125 km/h.

Ganinang alas 3:00 sa sayo nga kabuntagon, ang bagyo nga si Odette, namatikdan subay sa nga instrumento ug mga himan nga naniid niini nga anaa na sa 755 kilometros sa kasubangan sa Hinatuan, Surigao del Sur sa coordinates 8.7°N, 133.2°E.

Ang kakusog sa hangin nga gibitbit sa bagyo nga si Odette, nahimo nga mas kahadlokan tungod kay kini hinay nga nagkamang sa gikusgon nga 25 kilometros matag oras, gikan sa 15 km/h sa direksyon nga pa-amihanang-kasadpan.

Kini usab samtang ang Luzon nakasinati na usab sa epekto sa Amihan. 

Tungod niining mga sistema sa panahon, gipakayab na ang Tropical Cyclone Wind Signal (TCWS) No. 1 ibabaw sa Bohol, amihanan ug sentro nga bahin sa Sugbo sama sa lungsod sa Daanbantayan, Medellin, Bohol City, San Remegio, Tabogon, Borbon, Sogod, Carmon, Carmen, Danao City, Compostela, Liloan, Tabuelan, Asturias, City of Carcar, Pinamungahan, san Fernando, Toledo City, City of Naga, Balamban, Minglanilla, Cebu City, City of Talisay, Consolacion, Mandaue City, Lapulapu City, Cordova apil ang Camotes ug Bantayan Island. 

Gipakayab na usab sa PAG-ASA ang TCWS No. 1 sa habagatang-amihanan nga bahin sa Eastern Samar sa mga lungsod sa Guiuan, Mercedes, Salcedo, sa Dinagat Islands, sa kasubangan nga bahin sa Surigao del Norte sama sa mga lungsod sa Claver, Surigao City, Tagana-An, Placer, Gigaquit ug Bacuag lakip na ang isla sa Siargao ug Bucas Grande, ug ang amihanang bahin sa Surigao del Sur sa mga lungsod sa Carrascal, Cantilan, Madrid, Cortes, Carmen ug Lanuza.

Gani, segun pa sa PAG-ASA, mahimong karong adlawa, kasarangan pa ngadto sa kusog-kusog na nga huros sa hangin ang magpasuwabi ibabaw sa Kabisay-an, Occidental Mindoro ug Palawan lakip na ang Kalayaan Islands.

Kini nga hangin magkutaw sa dagat nga mahimong may kasarangan ngadto sa bawodon nga mga kadagatan.

Sa Huwebes pohon, masinati ang kusog ngadto sa grabe nga bunok sa uwan sa Dinagat Islands, Surigao del Norte, Camiguin, ug Misamis Oriental.

Dinhi sa ato sa Bohol, gibanabana ang kasarangan ngadto sa kusog nga uwan nga usahay mobunok, kondisyon nga mahimong masinati usab sa Leyte, Southern Leyte, habagatang bahin sa Eastern Samar, Siquijor, ug sa Caraga.

Sa mga palibot nga mga lalawigan sama sa Bicol Region, Zamboanga del Norte, nahibilin nga bahin sa Visayas ug Northern Mindanao makasinati sa kasarangan ngadto sa kusog nga uwan.

Mas mograbe ang sitwasyon sa uwan sa Biyernes pohon nga gikan sa kusog nga uwan, mobunok pa sa Central Visayas, Western Visayas, ug mga parts sa Palawan apil ang Cuyo ug Cagayancillo Islands.

Tungod niini, mahimong masinati ang katag-katag nga pagbaha, lakip na ang flash floods ug paghunlak sa yuta dala sa uwan sa mga lugar nga nalupa, ug kadtong mga pangpang nga mahumokan ilabi na niadtong mga lugar nga natumbok na sa hazard maps sa mga lugar nga may tag-as nga lanat sa uwan. (RAHC/PIA7 Bohol)


NAGKADUOL, NAGKAKUSOG. Hinay nga nagkaduol ang kusog nga bagyo nga si #OdettePH, subay sa pagtutok sa PAG-ASA. Giisa na karon ang storm signas sa Bohol ug Sugbo, dinhi sa kabisay-an. (PIA Bohol)

About the Author

Rey Anthony Chiu

Regional Editor

Region 7

Feedback / Comment

Get in touch