Georgia

No. of :

No. of Shares:

Currently viewed by: Marcus Rosit

Obligasyon pagpasiga, nabalhin na sa mga distribution utilities

TAGBILARAN CITY, Bohol, Feb. 10 (PIA) -- Nibalhin na ang bola ngadto sa mga kamot sa distribution utilities (DU) ang responsibilidad sa pagguyod sa mga linya sa nangabutalid nga mga poste ngadto sa mga kabalayan aron makasiga na. 

Kini human gikataho sa National Grid Corporation of the Philippines (NGCP) nga ila na nga napahibalik ang daku nga supply sa korente gikan sa Visayas Grid subay sa submarine cables sa Leyte, Febrero 9 sa mga als 4:08 sa hapon.

Ang mga DU nga Bohol Electric Cooperative I (BOHECO I), BOHECO 2 ug Bohol Light Company Incorporated (BLCI) nagsalig sa ilang dakung panginahanglan sa suplay sa korente alang sa mga kabalayan, gikan sa ikapagamit nga supply sa grid nga gikutay sa NGCP.

Ang BOHECO 1 nagserbisyo sa 26 ka kalungsuran apil ang Dauis ug Panglao, ang BOHECO 2 nagalagad sa 21 ka lungsod samtang ang BLCI maoy nag atiman sa panginahanglan sa suga nga dagitab sa Tagbilaran City. 

Sa katungod sa BOHECO 1, sa ilang taho niadtong alas 3 PM, February 09, 2022, mikabat na sa 35% sa ilang mga poste ang napabarug og balik ug andam na nga makakutay sa gahum dagitab. 

Kini hinuon, anaa pa sa 1,770 sa kinatibuk an nga 4,991 ka mga poste nga nangaluad ug nangabali atul sa bagyo. 

Gitaho usab sa DU nga may labing lapad nga service area nga kompleto na ang ilang pagpahiuli sa mga poste nga gikan sa NGCP substations ngadto sa ilang mga distribution substations.
Sa ilang mga poste padung sa mga kabalayan, napahiuli na ang 1,231ka poste sa 4,452 nga nangadaut.

Dala niini, napahibalik na nila ang koryente sa 19.93% o 31,306 sa kinatibuk an nga 157,060 ka konsumidor nga may koryente.

Taho sa BOHECO 1, 28,395 ka mga kabalayan sa ilang service area ang dili pa mapatauran og balik sa koryente tungod kay kini naguba sa bagyo. 

Sa BOHECO 2, sa 476 ka barangay nga ilang giserbisyohan, nahibalik ug andam nang ipakatay sa mga kabalayan ang korente sa 131 ka barangay. 

Kini anaa na sa 27.52% segun sa ilang taho.

Sa ilang kinatibuk-ang konsumidor nga may koneksyon sa suga, sa 145,109 ka kabalayan, anaa na sa 11,128 ka mga balay ang may suga na o anaa na sa 11.40% hangtud Enero 24, ug 47,478 sa mga kabalayan nga sakop nga konsumidor ang dili mapakutayan og balik sa korente kon dili pa mapaayo ang mga balay aron luwas sa aksidente ang mga namuyo dinhi. 

Sa BLCI, halos kompleto na ang ilang mga poste ug nagpaabut na lang sa daku nga suplay sa korente nga ikapakutay sa NGCP, matud pa sa mga tinubdan didto. (RAHC/PIA7 Bohol)

Gikumoskumos sa hangin nga dala ni Odette ang higanteng tore sa NGCP ga maoy kutay sa gahum dagitab sa Bohol. Kini hinuon tempraryong gipulihan sa nga ERS aron lamang makasuga ang dakung bahin sa Bohol. (PIA Bohol)

About the Author

Rey Anthony Chiu

Regional Editor

Region 7

Feedback / Comment

Get in touch