Georgia

No. of :

No. of Shares:

Currently viewed by: Marcus Rosit

Mga pahimangno alang sa eleksyon gipaambit sa COMELEC-7

CEBU CITY, Cebu, May 7 (PIA) -- Ang Commission on Elections Region 7 (COMELEC-7) mipasidaan sa tanang mga botante sa mga butang nga dili angay buhaton ug uban pang mga pahimangno alang sa umaabot nga adlaw sa piniliay karong Mayo 9.

Sa programang "Kasikas sa Barangay" sa DYRF Radio Fuerza niadtong Mayo 6, si Atty. Ferdinand G.S. Gujilde, ang regional spokesperson sa COMELEC-7, mibatbat sa mga butang nga wala gitugutan nga buhaton sulod sa mga nagkadaiyang presinto sa adlaw sa eleksyon.

Matod ni Gujilde, labing una sa listahan sa mga ginadili mao ang paggamit sa mga selpon sama sa pagkuha og mga hulagway, kung diin dili pwede makuhaan og litrato ang mga balota sa mga botante o unsa mang higayon nga anaa sila sulod sa mga presinto.

Gipadayag usab sa tigpamaba sa ahensya nga striktong ginadili sa tukmang adlaw sa piniliay ang unsa mang klaseng buluhaton nga may kalambigitan sa pagpangampanya sa mga kandidato o partido kay kini kalapasan sa gi mando nga mga election guidelines. 

Dugang niini, ang COMELEC-7 mihatag usab sa mga pahimangno bahin sa mga butang nga angay timan-an sa mga botante sa ilang pagbotar sa adlaw sa piniliay.

Ang mga botante gipahimangnuan nga susihon og maayo ang ilang mga vote receipt sa pagsiguro nga ilang mga gibotaran nga mga kandidato mao gayud ang nabasa sa Vote Counting Machines (VCMs), og sa higayon nga wala motukma ang anaa sa resibo ngadto sa gibotaran sa balota ang botante mopahibaw ug modoul dayun ngadto sa electoral board aron sa pag rekord niini nga panghitabo.

Kinahanglan usab nga magmatngon ang mga botante sa pag shade sa ilang mga balota aron kini dili masayop kay matag botante aduna lamang isa ka balota alang sa pagbotar niini.

Gidasig usab ang mga botante nga kung mahimu mobotar ug sayu aron dili mahasol sa higayon nga daghan na ang maglinya sa mga nagkadaiyang presinto.

Adunay gidaghanon nga 800 ka mga botante ang matag presinto kung diin 10 ka mga botante ang pasudlon sa matag higayon aron dili magdasok ang maong lawak ug aron usab masunod ang gipatuman nga mga health protocols.

Ang oras sa pagbotar magsugod sa alas 6 sa buntag og mahuman sa alas 7 sa gabie dayun pagpanira sa mga presinto.

Alang sa mga botante nga magpakita og síntomas sa COVID-19 sa adlaw sa pinilay, ang COMELEC adunay giandam nga mga isolation polling places kung diin ngadto mopahigayon sa ilang pagbotar kini nga mga botante.

Karon nga nagkaduol na ang adlaw sa eleksyon, gipasidan-an ni Gujilde ang mga botante nga magbinantayon sa ilang makuha nga mga impormasyon kabahin sa pinilay aron dili mabiktima sa mga mikatap nga fake news.

“Ayaw mo ug tuo sa mga fake news. Paminaw ra gyud mo sa mga announcements nga naggikan sa COMELEC. Of course, we expect nga aduna gyuy mga inconvenience, taas nga linya og init ang panahon. Agwanta lang tang tanan kay kini nga sakripisyo, unsa raman ni gamay ra i-komparar nimu sa three years or six years nga pangatundanan sa mga tawo nga atong pilion,” pagpahinapos sa tigpamaba sa COMELEC-7. (RGC/PIA7)

About the Author

Robinson Cabardo Jr

Information Officer I

Region 7

Feedback / Comment

Get in touch