TUGUEGARAO CITY, Cagayan (PIA) - - Melayagayya y produkto ira na micro, small, and medium enterprises (MSMEs) ta mappange nga passelebra ta Aggao nac Cagayan, nga yaya ay meka-439 ngana nga aniversaryo na keyana na provinsya na Cagayan.
Megafu ta pakitratu na gobyernu na provinsya anna y Department of Trade and Industry (DTI), yuri produkto ira ay meplasta ta Padday na Lima Trade Fair nga makwa ta Robinson’s Place Tuguegarao mamegafu ta Hunyo 23 adde ta Hulyo 3, 2022.
Segun kani Atty. Mabel Mamba, Chairperson na Aggao Nac Cagayan, yari nga trade fair ay mangiyawa ta oportunidad tapenu makadde y produkto ira na Cagayan ta local anna international nga merkado.
Nekagi gapa ni DTI Regional Director Leah Pulido Ocampo nga nerulay y produkto ira na Cagayan, ngem netabba na nga makkanayun lagapa nga uffunan na gobyernu y mallaku ira tapenu matakkilalan y produkto da ta interu mundo.
Yuri trade fair ay mangilayagayya ta produkto ira kagitta na laga ira, kakaw, kafe, ganna-gannug nga deko, anna yuri narumug nga longganisa Tuguegarao.
Meammung taw, makwa sa yuri Cagayan Cacao and Coffee Festival nu sitaw mepasingan y pallutu ta ganna-gannug nga produkto nga maggafu ta kakaw.
Egga paga y makwa nga fruit carving anna exhibit na makan ira ta Cagayan, kagitta na buko pie na Enrile, kakaw anna kafe na Ate Edith’s Food Products na Peñablanca, tuange ta produkto ira na Cat’s Food Products na Tuao anna KilKiling Upland Farmer’s Cooperative na Claveria.
Meammung ta ganna-gannug nga malaku, egga gapa y demonstration ira na kapadday na produkto ira kaggita na bakong weaving na Sta. Teresita, sarakat weaving na Sta. Praxedes, chicharice na Amulung, anna sugarcane juice na Piat.
Karuap-paga nga makwa ay art gallery anna demonstration, tuange ta art clinic ira kavulu yuri artist ira na Cagayan. Egga paga y mappange nga Cagayan Authors' and Writers' Summit nga mangiyawa ta seminar ira para ta writer anna publisher ira na provinsya.
Yuri bisita ira ta Robinson’s Place ay awayya nga umune ta Upper Ground Level Activity Area na mall tapenu mammuad-da y kapianan nga padda-padday nga mangipasingan ta sirib anna rulay na Cagayano ira. (JKC/PIA Region 2/ with reports from Gene V. Baquiran)
