Georgia

No. of :

No. of Shares:

Currently viewed by: Marcus Rosit

Aklan PHO nag 'update' sa COVID-19 ag iba pang baeatian

KALIBO, Aklan (PIA) --  Nagtao kurundaya eamang it mga “updates” ro Provincial Health Office (PHO) – Aklan nahanungod sa sitwasyon sa mga baeatian sa probinsya paagi sa sangka press conference pareho ku COVID-19 ag dengue, imaw man ro monkeypox nga ginadahanan gid it gobyerno nga makasueod sa nasyon.

Nangin mga "resource persons" sa nasambit nga press conference kaibahan it mga lokal nga media sanday Provincial Health Officer I Dr. Cornelio Cuachon, ag sanday Roger Debuque ag Gino Val Taytayon nga halin tanan sa PHO-Aklan ag ag mga focal persons/coordinators sa mga sari-saring programa sa ikamayad it eawas sa probinsya.

Unang parte sa press conference ro pagpresentar sa mga sitwasyon sa COVID-19 ag dengue. Ginpakita nga halin ku Enero 1 hasta it Hunyo 18, 2022, ro probinsya it Aklan hay nakalista it 2,557 nga mga kaso it COVID-19, kon siin tanan nga mga banwa kara hay may una nga kaso.

Sa nasambit nga mga binuean, ro banwang Kalibo ro nakalista it pinakamataas nga kaso nga 665 ag sinundan it Malay nga may 321; Numancia, 243; Banga, 195; Ibajay ag Makato nga pareho nga may 175; Batan nga may 132; Tangalan, 125; ag New Washington nga may 118.

Nagapamati ro mga katapu it media sa Aklan sa mga presentasyon nga ginpakita it mga opisyales halin sa Provincial Health Office nahanungod sa pinaka ulihi nga sitwasyon sa COVID-19 sa probinsya ag sa Dengue sa ginpaptigayon kurundaya nga press conference.Nagtao man ro mga taga PHO it impormasyon parte sa Monkeypox ag kon ano ro gina obra it gobyerno agud indo ra makasueod sa Pilipinas. Ro press conference hay ginpamunuan ni Dr. Cornelio Cuachon, PHO I, kaibahan sanday Roger Debuque ag Gino Val Taytayon.

Ro habilin nga mga banwa hay may mga kaso nga 76 ag panaba.

Halin ku Marso 27, 2020, ro probinsya it Aklan hay nakalista it kabilugan nga 15,246 nga kaso it COVID-19 kon siin 14,669 kara ro nagmayad ag 366 ro namatay.

Ginsugid ni Dr. Cuachon nga ro probinsya hay naka atenar it 80.45 porsyento nga full vaccinaton accomplishment kontra sa COVID-19 sa gin target nga numero sa populasyon, samtang para sa A2 ukon ratong may edad 60 pataas hay 83.25 porsyento ro habakunahan.

Parte sa dengue, base sa lista it PHO, halin it Enero 1 hasta it Hunyo 11, 2022, may halista ro probinsya nga 112 nga kaso ag may namatay nga 2.

Suno kay Dr. Cuachon, ro mga kaso makaron  hay 300 porsyento nga mas mataas sa mga kaso nga halista sa pareho nga tiyempo ku nagtaliwan nga dag-on.

Ro banwang Ibajay ro nakalista it pinakamataas nga numero nga 23, sinundan it Malay nga may 20; Kalibo, 17; Nabas, 11; samtang ro ibang mga banwa hay nakalista it 7 panaba, euwas eang sa banwa it Altavas ag Madalag nga owa pa it halista nga kaso.

Agud pirdihon ro dengue, ginpaabot it PHO ro panawagan makaron it Department of Health (DOH) nga “Crush Dengue Para Di Maglanding On You,” ag nagpanawagan sa tanan nga obserbahan ro 4S: Search and Destroy, Self-Protective Measures, Seek Early Consultation; ag Support Fogging/Spraying.

Suno kay Roger Debuque, ro fogging ag spraying sa makaron hay ginasugtan kon sa mga lugar nga abu it kaso it dengue.

Samtang, agud mas hipa intindi ro media nahanungod sa monkeypox ag makabulig man sanda sa pagpaeapnaag it impormasyon parte kara, nagtao man kara it oryentasyo si Gino Val Taytayon, Health Education and Promotion Officer.

Suno kana, ro monkeypox hay sangka “viral zoonotic disease” daea it mga sapat pareho ku ‘non-human primates’ pareho ku mga amo.

Ginsugid man nana nga agud indi makasueod sa nasyon rayang baeatian,nagpaguwa ro DOH ku Mayo 20, 2022 it mandu sa Bureau of Quarantine nga mangin alerto sa mga aeagyan pasueod sa nasyon agud maabangan ro monkeypox.

Sa pagatapos it press conference, nagpanawagan si Dr. Cuachon ag ro iba pang mga panelists nga magdahan gid ro tanan kontra sa mga masakit, pareho ku COVID-19 nga sa makaron hay iya pa gihapon, ngani ro tanan hay dapat magsuksok gihapon it face masks ag magsunod sa minimum health protocols. (JBG/VGV/PIA6 Aklan)

About the Author

Venus Villanueva

Writer

Region 6

Feedback / Comment

Get in touch