SAN JOSE, Antique (PIA)- - Ang Provincial Nutrition Council kang Antique tingub nga nagaduso kang pag-establisar kang Provincial Nutrition Office para dugang nga mapasanyog ang programa sa nutrisyon kag bilang katumanan sa Mandanas-Garcia Ruling.
Sa sangka Resolusyon, ang konseho nagpangabay sa Sangguniang Panlalawigan kang Antique sa pagdihun kang ordinansa nga ma-establisar ang Provincial Nutrition Office sa idalom kang opisina kang Gobernador.
Si Sangguniang Panlalawigan Member Mayela Mae P. Ladislao nga pinuno kang SP Member Committee on Health, Sanitation, and Social Services naghambal nga importante gid ang patukod kang amo nga opisina agud mataw-an kang prayoridad ang mga progama ukon lihuk para mataw-an ka solusyon ang problema sa nutrisyon sa probinsya.
Samtang si Nutritionist/Dietician Jocelyn Morano sa sangka paghinun-anun nag report kang resulta kang pagpangusisa kang Department of Science and Technology- Food and Nutrition Research
Technology- Food and Nutrition Research Institute nga kang tuig 2019 ang Probinsya kang Antique nagapangarwa sa tanan nga probinsya sa Region kang Visayas nga may pinakata-as nga ‘prevalence rate’ kang kabataan nga putot, sunod sa Probinsya kang Samar nga may 42 ka porsyento.
Suno sa Provincial Health Office ang probinsya kang Antique kang mga nagliligad nga tinuig nagapanguna man sa Rehiyon 6 sa lista kang mga kabataan nga putot kag kulang ang kabug-atun base sa resulta kang Operation Timbang Plus.
Si Acting Provincial Nutrition Action Officer Dr. Leoncio Q. Abiera, Jr. naghambal nga ang pagtukod kadya nag opisina makata-o kang higayon nga mapunduhan kang husto ang progama sa nutrisyon.
Si Ladislao naghabal man nga ang kadarang-an kang programa sa nutrisyon wara lamang nasarig sa mga nga-obra para sa ika-ayong lawas kundi dya tingub nga buligan kang tanan lakip na ang sektor kang agrikultura para sa kasiguruhan kang pagkaon, katinlu-on kang palibot kag suporta kang lokal nga opisyales.
Ginhambal ni Morano nga ang kakulangun sa pagkaon ukon food insecurity sara sa bahol nga rason kang malnutrisyon sa probinsya.
Si Provincial Agriculturist Nicolasito Calawag nagpromisa man kang anang suporta sa lihuk kang mga kabaranggayan para mataw-an ka solusyon ang malnutrisyon.
Ang konseho nagalaum nga ang pag-establisar kang Provincial Nutrition Office taw-an gid kang suporta kang Sangguniang Panlalawigan. (JBG/PSM/PIA-Antique)
