Georgia

No. of :

No. of Shares:

Currently viewed by: Marcus Rosit

Mga prayoridad nga programa, plano ginlatag ni PBBM sa SONA

SAN JOSE, Antique (PIA) – Ginplastar ni President Ferdinand “Bongbong” Marcos, Jr. ang mga prayoridad nga programa kag plano kang ana administrasyon para sa pungsod Pilipinas.

Sa ana labing una nga State of the Nation Address (SONA) nga ginhiwat sa Batasang Pambansa, Hulyo 25, gin-isa-isa ni PBBM ang mga tikang nga makabulig sa pagpamag-an kang kabuhi kang mga Pilipino sa tunga kang ‘new normal’ nga dara kang COVID-19.

Isa sa ana mga prayoridad ang pagsiguro nga mabaskug ang ekonomiya pamaagi sa pag-implementar kang komprehensibo nga mga programa kag reporma, amo man ang pagtugro kang parangabuhian sa mga nawad-an kang ubra bangud sa pandemya.

Ginsiguro man ni President Marcos nga wara dun ti lockdown nga matabo para tayuyon ang pagbangon kang ekonomiya, pero ana ginhambal nga dapat dire-diretso sa gihapon ang pagsunod sa health protocols kag ang pagbakuna kang booster shots.

Tuyo na man nga pabaskugon ang sektor 

Courtesy: Radio Television Malacañang (RTVM) and People's Television Network, Inc. (PTV)

kang agrikultura pamaagi sa pagtugro sa mga mangunguma kang teknikal nga suporta, makinarya, kag pautang.

Dugang na pa nga dapat pasangkaron ang pagtuon kang mga moderno nga teknolohiya sa agrikultura kag ang pag-ubra kang mas duro nga farm-to-market roads para mas mapadasig ang pagbiyahe kang mga produkto.

Ipadayon man kang presidente ang agrarian reform sa pungsod kag ang temporaryo nga pag-untat sa pagbayad sa amortisasyon sa lupa sa sulod kang isa ka tuig.

Padayunon kag mas pasangkaron na man ang programa nga Build, Build, Build kang administrasyon ni anay Presidente Rodrigo Roa Duterte sa pagpati nga amo diya ang pundasyon kang pag-ugwad kang pungsod.

Courtesy: Radio Television Malacañang (RTVM) and People's Television Network, Inc. (PTV)

Iban pa sa mga prayoridad ni PBBM ang pag-invest sa pangteknolohiya nga imprastraktura, sampat nga suplay kang enerhiya, pagprotekta sa teritoryo kag soberanya kang Pilipinas, pagpanami kang mga pasilidad sa ospital, pagbutang kang mga rural health units sa mga marayo nga lugar, pagpasangkad kang kalidad kang edukasyon, pagprotekta kang dunang manggad, turismo, kag iban pa.

Nagalaum man si Vice President Sara Duterte nga suportahan kag buligan kang mga Filipino ang presidente sa pagtuman kang ana mga programa kag plano para sa Pilipinas. (AAL/BPS/PIA Antique)

About the Author

Bernard Ceasar Susbilla

Information Officer I

Region 6

Electronics Engineer/Writer

Feedback / Comment

Get in touch