Georgia

No. of :

No. of Shares:

Currently viewed by: Marcus Rosit

DOT, DTI magtakda og presyo sa mga produkto ug serbisyo sa Virgin Island

TAGBILARAN CITY, August 3 (PIA) -- Gi-anunsyo ni Department of Tourism (DOT) Kalihim Christina Frasco ang pakig-alayon nila sa Department of Trade and Industry (DTI) alang sa pagtakda og resonableng presyo sa mga produkto ug serbisyo sa Virgin Island sa lungsod sa Panglao.

Kini human sa pagbayad og kapin sa P26,000 sa usa  ka grupo sa mga turista alang sa mga gikaon nilang seafoods sa maong isla.

Nahimong viral sa social media ang post sa usa  ka netizen kalabot sa maong presyo nga nabayad sa mga turista..

Matud pa ni Frasco sa usa ka pahayag nga nasabtan niya ang sitwasyon ug mga hulga nga gi-atubang sa mga negosyo nga may kalabotan sa turismo aron makabawi sa pagkabangkarota tungod sa pandemya.

Gitumbok sa Kalihim nga kinahanglan usab sabton ang mga turista ug angay seguradohon nga mahimong maayo ang ilang kasinatian pinaagi sa de-kalidad, apan resonableng presyo sa mga produkto ug serbisyo.

Una niini, gimanduan na ni Gob. Erico Aristotle Aumentado ang Sangguniang Panglalawigan (SP) nga ipa-imbestiga ang mga panghitabo.

Nagpasalamat usab ang gobernador sa social media kay matud pa nakahatag kini og lig-on nga rason aron makamugna na ang SP og mga resolusyon o ordinansa nga makahatag og proteksyon sa mga turista nga sa dugay nang panahon gipahimoslan sa pipila ka negosyante sa lungsod sa Panglao.

Samtang ang Department of Environment and Natural Resources (DENR) nipagawas usab og pahayag nga imbestigahan nila ang ‘overpricing’ sa mga pagkaon sa maong isla

Giingong nakig-alayon na usab ang buhatan sa Protected Area Management Board sa Panglao Island Protected Seascape (PIPS) kalabot sa gipahigayong imbestigasyon.

Matud pa sa DENR, ang Virgin Island parte sa PIPS, nga namugna pinaagi sa Republic Act 11038 o ang Expanded National Integrated Protected Area Systems Law. (ECB/PIA7 Bohol)

About the Author

Elvira Bongosia

Writer

Region 7


Feedback / Comment

Get in touch