Georgia

No. of :

No. of Shares:

Currently viewed by: Marcus Rosit

“No Walk-in Policy” strikto nga gipatuman sa DSWD

PAGADIAN CITY, AUGUST 30 (PIA)-Padayon nga gipahibalo sa Department of Social Welfare and Development (DSWD-IX) ang mga aplikante sa ilang educational assistance program nga strikto nga ilang gipatuman ang “No Walk-in Policy”.

Kini ang gipahayag ni Ivan Eric Salvador, ang regional information officer sa maong ahensya atol sa senemanang programa sa radyo nga “Kapihan sa PIA” nga gisibya sa DXPR radio station ning dakbayan ning bag-o pa lang.

Matud pa ni Salvador, ang mga aplikante sa Assistance to Individual in Crisis Situation (AICS) gikinahanglan una nga mopailawom sa online registration aron hapsay ug linaw ang pagahimoon nga pay-out sa matag-adlaw nga Sabado sa mga buhatan sa DSWD sa tibuok nasud.

Kahinumduman nga sa nakalabay nga duha ka Sabado, midagsang pa sa gihapon ang mga aplikante sa ilang buhatan bisan pa sa mga pahibalo nga makita sa ilang facebook pages ug advisories nga gipapilit gawas sa mga ilang buhatan.

“Strikto kaayo kami nga nagpatuman sa ‘No Walk-In Policy’ aron nga malikayan ang siksikan ug pagdagsang sa mga tawo. Aduna kami listahan nga gihatag sa security personnel nga kung wala ang ngalan sa tawo, dili pwede nga pasudlon sa opisina,” dugang pagpasabot ni Salvador.

Dugang pa niya nga kung dili man makahibalo sa online registration, sila ang giawhag nga magpatabang sa ilang mga higala, paryente ug mga silingan.

Sa nagpabilin nga upat ka Sabado, gilauman sa DSWD nga hingpit na nga hapsay ang pagpatuman sa AICS program sa tibuok nasud.

Gipunting sa nasangpit nga ahensya nga moabot sa 26,000 ka mga benepesyaryo sa AICS program sa Zamboanga Peninsula ang matanyagan sa cash assistance ug kini nag-depende na lamang sa availability sa pundo sa ilang buhatan. (Elmei Jane Gamotin-GIP/GCC/PIA-Zamboanga del Sur)

About the Author

Gideon Corgue

Writer

Region 9

Feedback / Comment

Get in touch