Georgia

No. of :

No. of Shares:

Currently viewed by: Marcus Rosit

265 ka mag-uuma sa Siquijor nakadawat ug hybrid seeds, abuno gikan sa DA

LARENA, Siquijor, Sept. 16 (PIA) -- Mokabat sa 265 ka mga mag-uuma sa humay sa Probinsya sa Siquijor ang nakadawat og hybrid rice seeds ug abono gikan sa Department of Agriculture (DA) samtang ang proyekto sa Community Hybrid Rice Farming (CHRF) magsugod karong ting-ulan, matod sa press release sa DA-Provincial Agriculture Coordinating Office dinhi. 

Sumala sa taho, mga 205 nga 50-kg. sako sa inorganic fertilizers ug 100 nga 15-kg sako sa hybrid rice seeds ang giangay og apod-apod sa mga mag-uuma sa humay, base sa gidaghanon sa nadawat nga “input” para sa ilang ka-humayan.

Mga mag-uuma nagkuha sa sipang-apod-apod nga hybrid rice seeds nga hinabang gikan sa DA-PATCO. (RAC/DAPATCO photo)

Uban sa Licoan Siquijor Farmer Irrigators Association (LISIFIA) sa Munisipyo sa Maria nga giila nga hybrid cluster o Big Brother, 115 nga mga mag-uuma sa humay nga miyembro sa asosasyon ang nakadawat og 50 ka sako sa binhi sa humay og 105 ka sako sa abuno, samtang 46 nga mga mag-uuma sa humay gikan sa Munisipyo sa Lazi ang nakadawat og 20 ka sako nga binhi sa humay og 40 ka sako sa abuno, 26 gikan sa San Juan nga adunay 7 og 14 ka sako, 17 gikan sa Siquijor nga adunay 10 ug 20 ka sako, 11 gikan sa Larena nga adunay 10 og 20 ka sako, og gikan sa Enrique Villanueva nga adunay tulo ug unom ka sako matag usa.

Base sa datos, 554.34 ka ektarya ang giugmad alang sa rice farming nga diin 209.75 ka ektarya ang gitamnan og hybrid nga humay — 190.50 ka ektarya panahon sa ting-init og 19.24 panahon sa ting-ulan, matod sa taho.

Niadtong 2021, ang mga lungsod lamang sa Maria, Siquijor og San Juan ang nakatanom og hybrid rice seeds niadtong panahon sa ting-ulan, nga nakaprodyus lang og 75.91 metrikong tonelada, kompara sa 592.66 metrikong tonelada nga produksyon sa maayong kalidad nga mga liso sa humay.

Karong tuiga, gidahum ang dakong pagtaas sa produksyon sa hybrid nga klase sa humay, samtang gituman ang proyekto sa CHRF dinhi sa Siquijor, sumala pa ni matod ni Dr. Julius Galvan, ang Officer-in-charge sa DA-Agricultural Program Coordinating Office (APCO) ning probinsya.

Si Nestor Mamhot, usab Presidente sa LISIFIA, miingon nga dako kaayo ang iyang dungog nga nahatagan og responsibilidad sa pagdala sa proyekto.

“Mapasalamaton kaayo mi sa association nga gisaligan mi ani nga proyekto sa Munisipyo sa Maria, sa Provincial Agriculture Office, ilabi na gyud sa DA,” sumala pa niya.

 “Dako kaayo’g tabang namo ning maong mga “inputs” kay matabangan mi nga maminusan ang among gasto, ilabi na gyud karon nga gakamahal na kaayo ning presyo sa binhi ug abono,” dugang pa ni Mamhot.

Dugang pa, ang asosasyon malaumon usab nga magapadayon ang DA sa pagsuporta sa ilang rice farming pinaagi sa paghatag og mga makinarya og galamiton ubos sa proyekto sa CHRF. (RAC/MFH PIA7 Siquijor gikan sa mga taho ni Mary Jane Banglos, DA-PATCO)

About the Author

Rizalie Calibo

Writer

Region 7

Feedback / Comment

Get in touch