Georgia

No. of :

No. of Shares:

Currently viewed by: Marcus Rosit

BFAR magbutang og duha ka lambaklad sa Valencia, Duero

TAGBILARAN CITY, Bohol, Sept. 20 (PIA) -- Aron tubagon ug kapun-an og dyutay ang kakuwang sa isda nga ikabaligya sa kamerkadohan, gibutyag sa Bureau of Fisheries and Aquatic Resources (BFAR) nga ilang giproseso karon ang duha pa ka lambaklad alang sa Duero ug Valencia.

Ang lambaklad, usa  ka higante nga bunsod, pana inay adto itaud sa mabaw, ang lambaklad adto ipahimutang sa lawod nga may kalawmon nga sobra sa 40 ka dupa, saysay ni BFAR Provincial Fishery Officer Candido Samijon, didto sa Kapihan sa PIA.

Apan inay nga giusok sa kawayan, ang lambaklad migamit sa mga bug-at nga palugdang aron motul-id ang pokot nga may sawog ug may bunoan usab.

Usa  ka pangisda nga giingon nga uyon sa kalikopan kay makakuha kini segun sa isda nga masulod og masangit sa ilang pagpanon paingon sa ilang mga migration areas, kasagarang makuha niini mga mahalong isda sa lawod ug makaya nga makuha niini ang 50-100 ka kilos nga isda matag adlaw nga tanda.

Hinuon, sanglit tua sa lawod, mas dako ang mahimong magasto sa pagbalikbaik og subay sa pokot.

Ug subay sa kasinatian sa unang natukod nga lambaklad sa Bohol, maayo ang gikita sa mga mangingisda sa Candijay nga didto magpahimutang sa Cogtong Bay, segun sa kasinati-an sa mga mangingisda didto.

Gihipos pa ang nasampit nga lambaklad sukad niadtong may pahibaw sa bagyo ug wala pa ibalik samtang nagpuna pa usab sa mga buslot sa pokot.

Kon mahiabut ang duha pa ka lambaklad alang sa Duero ug Valencia, moabut na sa unom ka lambaklad sa Bohol.

Wala pa ma ikalusad ang uban, mag bag-o nga lambaklad ang Garcia Hernandez, Guindulman ug  ang sa Jagna, nga pulos gigastohan sa ilang mga munisipyo ug giabagan sa BFAR, matud ni Samijon.

Ang gipangayo nga lambaklad sa Duero ug Valencia, gikan kini sa  pundo sa BFAR, dugang sa Provincial Fishery Officer.

Kini usab samtang nagpadayon ang BFAR sa pag-ayum-ayom aron pagpahiuli sa ilang mga pasilidad nga gilampurnas sa bagyong Odette.

Subay sa banabana sa Department of Public Works and Highways nga maoy gitahasan sa kagamhanan sa pagtan-aw sa mga nangagubang pasilidad nga iya sa kagamhanan, nagkinahanglan ang BFAR Bohol og kapin kon kulang P300 milyones alang sa kompleto nga pagpahiuli sa iyang mga 5 ka hatcheries.

Apan sa kasubo sa BFAR, P15 milyones lamang ang pundo nga gihatag alang sa pagpahi-uli sa mga pasilidad niini nga naghatag og supply sa mga semilya sab angus, tilapia ug mga lambay, lakip na ang mga primerang klase sa isda sama sa pompano, ug pugapo.

Niini, gibahinbahin sa BFAR, matud pa ni Samijon, aron bisag ginagmay, makalihok pa gihapon ang ilang mga paitlogan sa isda ug makahatag kini og semilya sa mga bangusan ug tilapyanan aron may dugang isda sa kamerkadohan.

Kini bisan pa usab nga nagpabiling wala pa maayo ang ilang mga administrative offices nga nawad-an og mga atup ug nangaguba sa bagyo.

Ang ato lang, basta makapaitlog pa gihapon ta, sa mga awa nga nahibilin human ang daghan niini, nakalayas dihang ming-awas ang mga tangke nga gisudlan niini niadtong pagbagyo, saysay ni Samijon. (RAHC/PIA7 Bohol) 

Bisag wala pa maabti sa pundo nga gikinahanglan sa pagpahiuli sa ilang mga pasilidad nga nagsupply sa semilya sa mga bangusan, gipaayom-ayom sa BFAR ang pundo aron makalihok ang ilang mga production areas, pauwahi na ang mga admin offices nga gibagyo, subay pa ni BFAR Provincial Fishery Officer Candido Samijon. (PIA Bohol)

About the Author

Rey Anthony Chiu

Regional Editor

Region 7

Feedback / Comment

Get in touch