Georgia

No. of :

No. of Shares:

Currently viewed by: Marcus Rosit

PRC nagbukas  sa Antique


SAN JOSE, Antique (PIA) - - Nagabaton run kang regular nga transaksyon ang Professional Regulations Commission (PRC) kasunod kang ana pagbukas kasan-o gid lamang sa 3rd floor kang Robinsons Mall rugya sa Antique.

Nagpasalamat si PRC Commissioner Erwin M. Enad sa gobyerno lokal kang San Jose, Probinsiya kang Antique kag Robinsons Mall nga nagpatigayun ang paghatod kang  kang serbisyo kang PRC sa Antique.

Dugang na pa nga tungod sa pagbuligay kang mga nasambit nga ahensya, dya magaserbe nga tulay sa mga propesyonal nga Antiqueño  nga mangin madali ang anda transaksyon sa PRC.

Ang PRC Antique ikarwa nga "offsite center" sa Robinsons Mall, Ika- 31 sa pungsod kag ika-lima sa Western Visayas.

Sa bahin ni Mayor Elmer Untaran, tana naghambal nga ginahandom  na ang pagpatindog kang PRC sa probinsiya kag nataw-an dya kang katumanan.

Kang nagliligad nga tinuig, ang Munisipyo ka San Jose de Buenavista naghiwat kang PRC on the road project, sa diin duro nga mga propesyonal ang naka benepisyo rugya sa Antique.

Gindayaw man ni Untaran ang suporta

kang Robinsons Mall sa padayon na kadya nga pag baton kang pira ka mga ahensya kang gobyerno sa idalom kang Lingkod Pinoy Center.

Ginhambal ni Robinsons Operations Director for Visayas and Mindanao Joseph Sian nga ang Robinsons Mall malipayon sa pagserbe sa mga katawhan kang Antique, baylo kang anda pagbaton kag tugro pagsakdag sa nasambit nga establisimiento.

Sa ana mensahe, nagtugro man pagdayaw si Antique Lone District Representative Antonio Agapito Legarda sa PRC sa pagdara kang anda serbisyo sa Antique.

Dugang pa ni Legarda, ang PRC service center mangin isara gid ka bahol nga bulig sa mga professionals rigya sa probinsya, kun sa diin, indi ron nanda kinahanglan pa mag adto sa Iloilo para sa anda transaksyon sa PRC.

Ang PRC Antique magabukas kada Lunes asta Biyernes, las 8 sa aga asta las 5 sa hapon nga may mga asunod nga serbisyo: Application for Licensure Examination, Initial Registration, Renewal of Professional Identification Cards, Issuance of Duplicate Professional Identification Cards, Authentication of Certificate of Registration (COR) and/or Professional Identification Card (PIC), Issuance of Certificate of Good Standing, Original Certification of Board Rating/Board Passing, Authentication of Board Rating/Board Passing kag Verification of Board Rating.

Samtang, ang PRC Antique ginapangunahan ni Jean Pearl P. Amar bilang team leader sa idalom kang pagdumara ni Regional Director Romel B. Balisang kang PRC 6.

Hambal man ni Untaran, may gintugyanan nga tatlo ka mga empleyado ang LGU kang San Jose de Buenavista para magsuporta sa grupo kang PRC Region 6. (JBG/SJQ/SRA/PIA-Antique)

About the Author

Pilar Mabaquiao

Writer

Region 6

Feedback / Comment

Get in touch