SYUDAD SANG ILOILO (PIA) - - Naglagda ang Development Bank of the Philippines (DBP) sang kasugtanan upod sa Department of Human Settlements and Urban Development (DHSUD) para sa pagbalay sang financing scheme nga magahatag sang masarangan kag disente nga balay para sa informal settlers.
Ginpahayag ni DBP President kag Chief Executive Officer Emmanuel G. Herbosa nga ang bangko magahatag sang pinansyal kag teknikal nga bulig sa DHSUD agud makabulig sa pagsabat sang kinahanglanon sang "mass housing" sa pungsod pinaagi sa pagtukod sang isa ka milyon nga unit sa tagsa ka tuig tubtub 2008.
Ang DBP amo ang ika-anum nga pinakadaku nga bangko sa pungsod sa bahin sang assets kag nagahatag sang suporta sa pagpa-utang sa apat ka mga importante nga sektor sang ekonomiya - infrastructure and logistics; micro, small and medium enterprises; environment; social services and community development.
Samtang, ang DHSUD isa ka nagapanguna nga ahensya sang panguluhang nasyonal nga responsable sa pagdumala sang housing, human settlement kag urban development sa pungsod. Ginapangunahan man sini ang flagship initiative sang gobyerno nasyonal nga “Pambansang Pabahay Para Sa Pilipino: Zero ISF Program for 2028” nga nagatuyo sa pagtukod sang anom ka milyon nga housing units sa anom ka tuig.
Sa idalum sang Memorandum of Understanding sa tunga sang duha ka ahensya, kilalahon sang DHSUD ang mga kwalipikado nga mga real estate developer kag kontraktor nga maga-develop sang project sites kag magbulig sa pagpreparar sang kinahanglanon para sa pondo sang proyekto. Magabalay ang DBP sang loan program nagasentro sa paghatag sang developmental loan para sa housing project sang DHSUD.
Suno kay Herbosa, ang suporta sang bangko sa DHSUD kaangut ini sa pagpanikasog sang DBP nga mapasangkad ang suporta sa social services kag community development kasubong sa housing nga may ara napamatud-an nga multiplier effect sa pagpahagan-hagan sang kaimolon.
Gindugang sini nga tubtob sang katapusan sang Hunyo 2022, ang outstanding loans para sa social infrastructure and community development nga mga proyekto sang DBP nagalab-ot sa P98.49-bilyon nga nagarepresentar sang 20 porsyento sang iya sini total loan portfolio.
Ginsiling naman ni DBP Executive Vice President for Development Lending Paul D. Lazaro nga ang bangko pinaagi sa iya “Building Affordable Homes Accessible to Every Filipino” or BAHAY Program, nag-aprobar na sang masobra sa P9.37-bilyon nga loan sa mga mahimo makahulam para sa nanuhaytuhay nga housing projects tubtub sining katapusan sang Hulyo 2022.
Suno pa kay Lazaro, ang BAHAY Program sang DBP nagaserbe bilang mayor nga credit facility para sa housing sector kag naga-cover sang end-to-end process sang housing development humalin sa pagbakal sang duta tubtub sa pagpasanyog sang lugar kag pagtukod sang balay.
Humalin sang ginsuguran sang 2011, ang BAHAY Program nagtugot sa bangko nga pasangkaron kag pasanyugon ang iya suporta sa mga pagpanikasog sang gobyerno agud i-plug ang housing backlog pinaagi sa paghatag sang short-term and long-term financing, gindugang ni Lazaro. (JBG/Translated from DBP PR by laf/PIA6-Iloilo)
