CEBU CITY, Cebu, Aug. 15 (PIA) -- Ang Philippine Statistics Authority (PSA) opisyal nang milusad sa 2022 Community Based Monitoring System o CBMS pinaagi sa gipahigayon nga press launch alang sa nationwide roll-out niini niadtong Agosto 8.
Sa maong aktibidad giprensentar sa ahensya ang tumong ug uban pang impormasyon kabahin sa CBMS isip usa ka statistical activity nga pangulohan sa mga nagkadaiyang local government units (LGUs).
Pinaagi usab sa press launch, ang PSA naninguha sa pagpahibaw sa katawhan kabahin niini nga sistema sa pagkuha ug lain-laing impormasyong nga naggikan hangtod sa matag ka barangayan.
Pinaagi sa RA 11315, o nailhan nga Community-Based Monitoring System (CBMS) Act nga nahimung balaod niadtong Abril 17, 2019, ang PSA gimanduan sa pagpatuman sa CBMS pinaagi sa Community-Based Statistics Service of the Censuses and Technical Coordination Office.
Ang CCBMS usa ka organisado nga sistema nga nakabase sa teknolohiya sa pagkolekta, pagproseso, ug pag-validate sa mga gikinahanglang disaggregated nga datos nga mahimong gamiton alang sa lokal nga pagplano, ug pagpatuman sa mga programa, samtang naghatag ug gahom sa mga komunidad sa pag-apil sa proseso niini.
Ang aktibidad naglangkob usab sa pagkuha og mga datos sa lokal nga lebel nga mamahimung basehan sa pagpuntirya sa mga panimalay alang sa mga programa sa gobyerno nga gitumong sa paghupay sa kakabos ug pagpalambo sa ekonomiya.
“Ang CBMS mao ang pagkuha og information gikan sa katawhan kung diin ang product niini naay data bank that will serve as sources of information which will benefit both the LGUs and national government agencies. Ang gamiton niini is laptop as mode of data collection and naa usab ni geotag while we conduct survery makuha pud natu ang locations sa mga households,” sigon ni Engr. Felixberto Sato Jr., supervising statistical specialist sa PSA7 sa iyang interbyu sa programang "Kasayuran" niadtong Agosto 10.
“It is a very rich source of information nga naa mismo naggikan sa LGUs. Sa CBMS makakuha tag data down to the barangay level, it is a collection of almost all nga mga surveys nga gipahigayon ni PSA,” dugang usab ni Engr. Leopoldo Alfanta Jr., ang chief statistical specialist sa PSA7.
Sa proseso sa CBMS, ang mga syudad ug kalungsuran mao ang mopahigayon sa data collection samtang ang PSA sa ilang bahin mao ang mohatag og technical support aron nga malampuson nga mapahigayon ang aktibidad.
Matod sa PSA, ang CBMS questionnaire adunay 18 nga sections kung diin pipila sa mga datos og impormasyon nga makuha niini naglangkob sa health, migration, education, employment, income, family sustainance activity, agriculture activity, fishing activity, social protection, crime victimization, financial inclusion, e-commerece, digital economy, ug housing characteristics.
Miingon usab ang ahensya nga ang pagkuha sa mga datos molungtad ug duha ka buwan nga sugdan karong Agosto ug mahuman karong Oktubre 5, kini mao ang general timeline sa CBMS.
Sa pagkakaron, anaa sa 36 ka mga LGUs sa tibuok Central Visayas ang unang mopahigayon sa CBMS kung diin 15 ka mga LGUs ang naggikan sa Cebu, 12 sa Bohol, 5 sa Negros Oriental, ug 4 sa Siquijor.
Sa 36 ka mga LGUs, 30 niini ang PSA funded samtang 6 ang LGU funded.
“CBMS is not only for the government but also for the people, to improve the lives of the people. We call the public to really cooperate on this activity, dili mani dali mahuman so mangayo pud mig patience sa public and ato usab e-accomodate atong mga data collectors kay in the end ang maka benefit atoa ra gihapong mga LGUs,” pagpahinapos ni Alfanta. (RGC/PIA7)
