Georgia

No. of :

No. of Shares:

Currently viewed by: Marcus Rosit

SP mohangyo sa GSIS sa pagpa text blast pahinumdom sa APIR

TAGBILARAN CITY, Bohol, Nov. 5 (PIA) -- Mohangyo ang Sangguniang Panlalawigan (SP) ngadto sa Government Service Insurance System (GSIS) sa pagpalig-on pa sa ilang mga pamaagi sa Annual Pensioners’ Information Revalidation (APIR), dala sa namatikdang pagkasuspenso sa mga benepisyo sa 374 ka sakop, tungod sa kapakyas sa ilang tinuig nga revalidation.

Kini nahilakip sa pipila ka hangyo sa SP human nagkatigum ang Committee on Social Services ug ang mga tinugyanan sa GSIS, ug Social Security System (SSS) taliwala sa hangyo sa mga pensioner ug retirees nga tabangan sa SP aron mahibalik ang nasuspenso nga mga benepisyo.

Nahibaloan didto sa tigum nga gipatawag sa Komitiba nga gipangunahan ni Board Member Lucille Lagunay, nga mikabat na sa 374 ka sakop sa GSIS nga napaundang ang ilang mga pension tungod sa pagkapakyas niini sa pagtuman sa ilang tinuig nga revalidation subay sa pamaagi aron ilhon kon tinuod ba nga buhi pa ug ang benepisyo bas a mga nabinlan nga survivors sa pensionadong sakop, sila ba gayud ang tinuod nga sumusunod.

Sa katungod sa GSIS, gipatuman niini ang APIR aron pagsuta sa kamatuoran sa mga detalye sa mga claimants, ug paglikay sa hitabo nga minilyon ang pundo nga nahanaw tungod sa pagdawat sa pension sa mga dili angayan nga maoy modawat.

Sa mga retirees usab sa pribadong sector, ang SSS may kaugalingon nga sistema sa pagseguro nga ang ilang gihatagan sa pension mao gayud ang angayan nga modawat.

Sa SSS, ang Annual Confirmation of Pensioners (ACOP) o ang tinuig nga kompirmasyon gigiyahan dili lamang sa personal nga pagpakita sa pensioner o survivor niini, apan sa sistema nga gilagda sa  SSS Circular No. 26, s. 2018.

Sa GSIS APIR, gikinahanglan ang pensionado moadto sa GSIS Wireless Automated Processing System (GWAPS) kiosks aron mag-update sa iyang data, o mopailawom sa personal online interview sa pagpaschedule niini pinaagi sa email, text messaging o mismo ang personal nga pagpakita gayud sa retirado ug pensyonado nga sakop sa GSIS Office o Service Desk.

Kining tanan, kinahanglang himoon sa dili pa ang adlaw nga natawhan sa pensyonado o retiree, kinsa usahay makalimot usab sa iyang tinuig nga buluhaton ngadto sa GSIS.

Modawat man ang GSIS og hangyo aron sila na ang mobisita sa sakop nga dili na makahimo paglakaw, tungod sa kakuwang sa tawo, dili gyud niini maatul og atiman ang tanan, saysay sa representante sa GSIS.

Sa SSS, ang ACOP mahimo nga mas sayon tungod sa gipatuman niining data sharing technology nga nagggamit sa mas abante nga teknolohiya sama sa emails, video conferencing ug pagbisita mismo sa balay sa retiradong sakop aron makompirmar ang personal nga presensya niini.

Sa kaso sa GSIS, sa 374 ka suspendido nga mga pension, 191 niini sa mga retirado, samtang 183 usab niini alang niadtong mingdawat og pension isip mga sumosunod sa namatay na nga sakop.

Hinuon, gikataho nga padayon pa ang GSIS nga nagpatuman sa ilang home visitation apan pipila lamang niini ang mahuman, tungod usab sa kakuwang sa tawo.

Nunot niini, hangyoon sa SP ang GSIS Bohol Branch sa paghimo og text blast matag unang adlaw sa buwan ngadto sa sakop nga mag birthday aron ipahinumdom ang APIR, u gang pagkanunay og update sa ilang information system database sa mga retirees ug pensioners samtang ipa-palig-on ang information drive sa mga pamaagi sa ilang APIR aron makatabang ang mga LGUs sa pagpatuman niini. (PIA Bohol)

About the Author

Rey Anthony Chiu

Regional Editor

Region 7

Feedback / Comment

Get in touch