SAN JOSE, Antique (PIA) -- Naghiwat kang sangka medical-surgical-dental kag information caravan ang Provincial Task Force to End Local Communist Armed Conflict (PTF-ELCAC) para sa mga marayo nga barangay kang mga banwa kang Hamtic kag Sibalom.
Ang gobyerno probinsiyal kang Antique, paagi sa Peace and Order and Public Safety Office (POPS), kag mga miyembro nga ahensiya kang PTF-ELCAC nagtipon sa Bongbongan Elementary School sa Hamtic, Nobyembre 10, kag Tulatula Elementary School sa Sibalom, Nobyembre 11, para magdara kang nanari-sari nga serbisyo kag gift packs sa mga residente kang 18 tanan ka mga barangay.
Suno kay POPS consultant kag PTF-ELCAC lead convenor Margie Gadian, tuyo kang ginatawag nga “caravan of services” nga lab-uton ang mga barangay nga gina-kabig Geographically-Isolated and Disadvantaged Areas (GIDA) para ipabatyag sa mga pumuluyo ang presensya kag pag-ulikid kang gobyerno.
Dugang pa ni Gadian, gintinguhaan guid kang provincial task force nga matigayon ang aktibidad para makadara kang serbisyo sa mga nagakinahanglan, kapin pa nga duro ang naapektuhan kang pagpanalasa kang bagyong Paeng.
Ang medical-dental-surgical mission ginpangunahan kang mga katapo kang Philippine Army (PA), Philippine National Police (PNP), Philippine Coast Guard (PCG), Antique Provincial Health office (APHO), Angel Salazar Memorial General Hospital (ASMGH), Culasi District Hospital, kag mga volunteers halin sa pribado nga sektor.
Ang Provincial Social Welfare and Development Office (PSWDO) nag-tugro man kang food packs, samtang ang Philippine Statistics Authority (PSA) gindara ang anda kagamitan para sa PhilSys national ID kag late birth registration.
Si Jovelyn Agustin, 43 años kag residente kang Brgy. Linaban, Hamtic, isara sa mga nakabaton kang food pack kag libre nga pagpagabot kang unto.
Nagpasalamat si Agustin sa tanan nga mga ahensiya kag opisina kang gobyerno nga nagpadulong kag nagtugro kang bulig kag mga serbisyo nga wara sa anda komunidad.
Nagpadara man kang donasyon kaangay kang water jugs, tsinelas, kag t-shirts ang pira ka mga pribado nga kompanya kaangay kang Semirara Mining and Power Corporation, National Grid Corporation of the Philippines (NGCP), Felix G. Yusay Foundation, Inc., Kimberly Dawn Trading and Construction Supply, Magic Group of Companies, kag pira pa ka mga pribado nga negosyo kag indibidwal.
Samtang, ang information caravan ginpangunahan kang Philippine Information Agency (PIA) kag Provincial Information Office (PIO), kaimaw ang Philippine News Agency (PNA), Radyo Bandera Sweet FM, Buenavista Cabel TV, kag Radyo Brigada nga yara man para i-balita ang aktibidad.
Ang mga miyembro nga ahensiya kang PTF-ELCAC nga nagtambong sa aktibidad amo ang Department of Labor and Employment (DOLE), Technical Education and Skills Development Authority (TESDA), Department of Interior and Local Government (DILG), Public Attorney's Office (PAO), Integrated Bar of the Philippines (IBP), National Bureau of Investigation (NBI), Department of Social Welfare and Development (DSWD) kag iban pa. (AAL/BPS/PIA Antique)
