Georgia

No. of :

No. of Shares:

Currently viewed by: Marcus Rosit

Direktang byahe halin Taiwan magabalik sa KIA

KALIBO, Aklan (PIA) -- Uman nga magabalik ro direktang byahe halin Taiwan paagto sa Kalibo International Airport hara nga Disyembere 2022, suno sa Civil Aviation Authority of the Philippines (CAAP)-Aklan.

Sa isaea ka interbyu, ginhambae ni CAAP-Aklan manager Engr. John William Fuerte nga umpisa Disyembre 29, 2022, ro TigerAir Taiwan it China Airlines Group hay uman nga may mga direktang byahe paagto Kalibo.

Suno kay Fuerte, raya ro pinakabag-o nga nagdugang nga internasyunal nga byahe sa KIA bago magtapos ro dag-on; kung siin hara hay tama eang gid sa pag-inabot it mga turista ag bisita sa Isla it Boracay para sa selebrasyon it Bag-ong Dag-on ag Kalibo Ati-atihan Festival.

Ro nasambit nga kumpanya it eruplano hay magagamit it Airbus-320 aircraft nga may kapasidad nga magdaea it 180 ka mga pasahero.

Raya nga progreso, hambae ni Fuerte, hay maeagko ro maikabulig sa industriya

it turismo ag ekonomiya it probinsya nga mag-umwad pa gid.  

Sa makaron, ro iba pa nga mga direkta nga internasyunal nga byahe, kaparehas it Air Seoul, T'Way Airlines, ag JinAir, hay padayon nga naga-operar sa KIA nga may daywang byahe kada adlaw ag madugangan pa gid ra pag-abot it Marso 2023

Ginpasayud man ni Fuerte nga may mga kumpanya man it eruplano halin Singapore ro nagpabatyag it interes nga makaangkon it direkta nga byahe pa Kalibo nga posibleng pagaumpisahan ro andang operasyon sa KIA sa unang parte it  2023.   

Euwas kara, may ina man nga mga negosasyon sa pag-angkon it direktang byahe halin  Malaysia ag China. (AAL/SQP/PIA-Aklan)

About the Author

Sheila Patoza

Writer

Region 6

Feedback / Comment

Get in touch