KALIBO, Aklan (PIA) -- Ginpaabot ni Governor Jose Enrique Miraflores ro anang pagpasalig sa padayon nga pagsuporta sa mga inungang Aklanon imaw man ro mga inisyatibo para sa andang ikamayad sa ana nga Local State of the Children’s Report kurundaya eamang.
Ro anang pagpaabot it nasambit nga report ro sambilog sa mga mabahoe nga aktibidad sa pag-obserbar it probinsya it Aklan it National Children’s Month nga ginasa-ueog it bilog nga nasyon kada buean it Nobyembre.
Sa anang report, ginpasaeamatan nana ro sari-saring departamento it gobyerno probinsyal ag iba pang mga ahensya it gobyerno sa andang mga ginbulig para sa ikamayad it mga inunga sa aspeto it kaeuwasan, proteksyon, pag-umwad, partisipasyon, ag panggobyerno.
Para sa kaeuwasan, ginpasaeamatan ni Governor Miraflores ro Provincial Health Office (PHO) bangud sa pihak it pag-abot it pandemya nga COVID-19, hapadayon gihapon it nasambit nga upisina ro mga programa sa ikamayad it eawas it mga inunga.
Ginsambit nana ro pagpatigayon it pagbakuna sa mga unga nga nagapangidaron it manaba sa 18 anyos.
Ginsugid nana nga ku 2021, ro PHO hay nag report it 2,683 nga kaso it COVID-19 sa mga unga ngara, pero nagnaba ro numero ngara sa 484 bangud sa pagtinguha it PHO nga mabakunahan ro 192,356 nga mga unga.
Ginpasaeamatan man nana ro Provincial Social Welfare and Development Office (PSWDO) nga presente pirmi sa pagdaea it mga serbisyo sa mga unga, imaw man
ro mga upisina it Department of Labor and Employment (DOLE), Aklan Police Provincial Office (APPO), Aklan Provincial Population and Gender Office (AKPPGO), Department of Education (DepEd), Persons with Disability Affairs Office (PDAO)ag Sangguniang Panlalawigan (SP) it Aklan.
Ginsaksihan ro anang pagpaabot it report para sa mga inunga it mga pinuno it departamento it gobyerno probinsyal, mga empleyado, mga lokal nga opisyales, representante it mga ahensya it gobyerrno, mga Child Development Workers (CDW) ag mga inunga mismo sa ABL Sports Complex sa Kalibo. (JBG/VGV/PIA6 Aklan)
