TAGBILARAN CITY, Bohol, Dec. 20 (PIA) -- Nahibalik na gyud ang nutribun, kadtong pan nga bantok nga kanhi gikaon sa mga kabataan sa pangpublikong tunghaan niadtong 1970s.

Dinhi sa Bohol, ang Department of Science and Technology (DOST) pinaagi sa Bohol Provincial Science and Technology Office (PSTO) mipahiluna sa ilang kalihukan isip kabahin sa ilang Corporate Social Responsibility (CSR) pinaagi sa pagpanghatag og nutribuns ngadto sa mga kabataan sa pangpublikong tunghaan sa Alburquerque niadtong Disyembre 13, 2022.

Matud pa ni Bohol PSTO Vina Antopina, ang lungsod sa Alburquerque sa Bohol usa sa mga benepisaryo nga lungsod sa programa sa DOST nga Community Enhancement through Science and technology (CEST).

Hinuon, dili na ingon gyud sa unod niadtong nutribun kaniadto, ang nutribun nga gipanghatag sa kabataan mao kadtong squash variant, o may sahug nga kalabasa, alang sa mas hasug nga nutrina ug bitamina.

Ang Nuribun o karon nailhan na nga Enhanced Nutribun o “nutrition in a bun,” usa  ka matang sa pan nga hasug sa bitamina nga ginama sa kalabasa ug gipahimsog pa sa mga protina, iron, ug vitamin A.

Ang enhanced nutribun, mao na ang may gipamaayo pa nga nutribun kaniadto, salamat sa DOST-Food and Nutrition Research Institute (FNRI) nga maog mitutok sa pagpapuno pa niini sa mga gikinahanglan sa nutrisyon aron matubag ang panginahanglan sa dugang nutrisyon ug  ang kagutom nga nagsamok sa nasud.

Ang Nutribun-Squash variant kasamtangan nga gihugno sa Jojie’s Bakeshop, ang bugtong panaderia nga gitugotan sa DOST sa pagsagop sa ilang teknolohiya sa Enhanced Nutribun dinhi sa Bohol.

Sa kinatibuk-an, 1,944 ka nutribuns ang nahatag sa San Agustin Day Care Center, sa Bahi Primary School, sa Canlimpong Primary School ug sa Cantiguib Primary School.

Upat ka pangpublikong elementary schools usab ang nahatagan sa nutribun: ang sa Alburquerque Central ES, Dangay ES, Tagbuane ES, Toril ES) ug sa San Roque NHS sa Alburquerque, Bohol. (RAHC/PIA7 Bohol)