TAGBILARAN CITY, Bohol, Dec. 19 (PIA) -- Kon katugotan na sa Sangguniang Panlalawigan, pasugdan dayon ni Gobernador Erico Aristotle Aumentado ang proyekto nga may duha  ka parte, alang sa pagpadaghan sa manok bisaya nga pasanayon ug karnehon.

Pinaagi sa P11,769,000 nga pundo nga gikan sa Department of Agriculture (DA) ug tugbangan sa Kagamhanan sa Bohol og balig P2,769,000 agi og sweldo sa mga tawo nga mahi-assign didto, pagasugdan ang Native Chicken Hatchery, Processing nga may mga ipahimutang usab nga mga makina ug kagamitan ug Marketing Hub Facility Project sa Bohol.

Kahinumduman nga ang DA7 naglakip sa iyang mga gipakayab nga mga programa sa pagpadaghan pa sa kita sa mga mag-uuma pinaagi sa pagtanyag og mga serbisyo nga magsuporta niini, samtang magseguro sa mas hamugaway nga tinubdan sa luwas nga pagkaon alang sa rehiyon ug sa uban pang nanginahanglan niini.

Subay niini, nagpahan ang DA7 og P11 milyones ngadto sa kagamhanang probinsya pinaagi sa Office of the Provincial Veterinarian (OPV) alang sa katukoran sa Native Chicken Hatchery, Processing nga may mga makinarya ug gamit nga nasukip, ug Marketing Hub Facility.

Kini naglangkob sa pagpapusa sa mga itlog hangtud mapiso ug pagpatambok niini aron ikabaligya isip buhi o karne aron may kapanginabuhian na usab nga kasaligan ug mapahilunan ang sistema nga sagopon sa mga kalungsuran.

Segun pa ni Provincial Veteriniarian Dr. Stella Marie Lapiz, adunay duha  ka bahin ang proyekto - ang pasilidad sa paitlogan ug papus-anan nga dumalahon sa OPV ug didto ipahimutang sa Provincial Livestock and Poultry Farm sa Bilar, samtang ang Ihawan ug  ang pasilidad sa pagproseso sa karne lakip na ang pamaligya ug negosyo niini, dumalahon sa Ubay Native Chicken Growers Association.

Ang nahisgutang kahugpungan, una na nga napalusot sa gipahigayon nga pagscreen sa OPV aron maoy magdumala sa pasilidad, sanglit aduna na kini sobra pa sa 200 ka sakop.

Kahinumduman usab nga niadtong pila na  ka tuig ang minglabay, gisuwayan na sa OPV ang nahisgutang proyekto aron sutaon kon mogaya ba.

Namatikdan usab nga nindot ang resulta ug nakit-an nga kasaligan kini nga kita kon seryosohon lamang gayud, dason ni Lapiz. 

Alang niining nahisgutang proyekto, tugbangan sa Provincial Government ang DA7 sa pundo nga moabut sa P2,769,000 subay sa nahisulat sa Memorandum of Agreement tali sa DA nga gihan-ay sa Bohol aron masudan na ang proyekto.

Dugang ni Lapiz, nga ang tugbang nga salapi sa Kapitolyo itagana alang sa mga tawo nga sweldohan sa pagdumala niini ug sa mga kagamitan, makinarya ug ekipos aron makapadagan sa mga nahisgutang pasilidad.

Kini nga pahat gikan sa Provincial Government gani, napahimutang na sa tinuig nga budget sa OPV ubos sa iyang Native Chicken Program.

“Sa kaninit sa supply sa pagkaon ug sa  kasayon sa pagpamuhi og manok bisaya, tuyo gyud nato nga makapadaghan sa supply sa mga piso nga segurado na nga mabuhi, aron kapaalimahan, patambokon ug ikabaligya, buhi man o karne. Usab apil sa atong tumong ang pagpa-sagop niini sa tanang kalungsuran aron ilang magamit, kapaladpan  ug molahutay ang produksyon sa manok bisaya sa tibuok lalawigan,” dayag ni Lapiz.

Niini, misuwat na si Aumentado ug ming-endorso sukip na ang mga gikinahanglang dokumentos sa ika duhang higayon ngadto sa SP, sa Memorandum of Agreement nga papirmahan sa gobernador sa ngalan sa Bohol ug sa DA, aron mapatuman na ang proyekto.

Gipaabut usab nga sa dili madugay, himoan na og resolusyon sa SP aron katugotan ang gobernador nga molagda sa kasabutan tali sa DA, sa ngalan sa Bohol. (RAHC/PIA7 Bohol)