(Tagalog translation)
PhilHealth, tiniyak ang patuloy na benepisyo
BAGUIO CITY (PIA) -- Tiniyak ng PhilHealth ang patuloy na pagkakaloob nila ng benepisyo sa kabila ng pagsuspinde sa premium rate hike at income ceiling ngayong 2023.
Kinumpirma ni PhilHealth Corporate Communications Senior Manager Rey Baleña sa Laging Handa Public Briefing na tatalima sila sa kautusan ni Pangulong Ferdinand R. Marcos, Jr. para sa pagsuspinde sa nakatakda sanang pagtaas ng kontribusyon sa PhilHealth. Sinabi ni Baleña na napapanahon ang desisyon ng Pangulo lalo na at lahat ay apektado ng COVID-19 pandemic.
"Despite the suspension, wala pong magiging epekto sa operations ng PhilHealth at wala ring magiging epekto sa overall implementation ng National Health Insurance Program," pagtitiyak ng opisyal.
Sinabi nito na matutuloy din ang pagpapatupad sa mga bagong benefit packages ngayong 2023 ngunit magkakaroon lamang ng adjustments sa implementasyon ng mga ito.
Alinsunod sa PhilHealth Benefit Plan, kabilang sa mga ilulunsad ngayong taon ang Outpatient Benefit for Mental Health at Outpatient Benefit for Severe Acute Malnutrition.
Aniya, patuloy din ang COVID-19 coverage ng PhilHealth mula esting hanggang sa pagka-confine ng pasyente.
Pinaghahandaan din nila ang implementasyon ng Comprehensive Outpatient Benefit package na ipatutupad sa 2024.
"Ang aming commitment po ay patuloy na bigyan ng financial protection ang bawat Pilipino, ang bawat pasyente na mangangailangan po ng pagpapaospital. Ang commitment ng PhilHealth ay ipagpatuloy ang pagpapabuti ng benepisyo," aniya.
Siniguro pa ni Baleña na sa patuloy na pagsuporta ng mga miyembro sa pamamagitan ng kontribusyon, subsidiya mula sa nasyunal na gobyerno, at pondo mula sa PCSO at PAGCOR ay magtatagal ang mga programa ng PhilHealth. (JDP/DEG-PIA CAR)
