TAGBILARAN CITY, Bohol, Jan. 9 (PIA) -- Nipasidaan ang Department of Health (DOH) niadtong Domingo sa publiko batok sa mga hinimong post nga gipakatap online, ning higayona nag-advertise sa giingong siguradong tambal sa sakit sa kasingkasing.

Matud pa sa gipagawas nga advisory sa DOH, sayop nga gilambigit sa nahisgotang post si DOH officer-in-charge Maria Rosario Vergeire aron ipakatap ang sayop nga impormasyon.

“The DOH then reminded the public that non-communicable diseases and comorbidities like heart disease and hypertension can be prevented by practicing healthy habits and a healthy lifestyle such as proper diet and exercise among others (Gipahinumdoman usab sa DOH ang publiko nga ang dili makatakod nga mga sakit ug mga komorbididad sama sa sakit sa kasingkasing ug hypertension mahimong mapugngan pinaagi sa pagpraktis sa himsog nga pamatasan ug himsog nga estilo sa kinabuhi sama sa husto nga pagkaon ug ehersisyo ug uban pa),” matud pa sa advisory.

Gi-awhag usab ang publiko sa pagpa-regular o tinuig nga check-up aron matumbok ug malikayan ang nagkalain-laing sakit.

Gawas pa niini, subling gipahinumdoman sa DOH ang publiko sa pagkuha sa impormasyon gikan lamang sa mga lehitimong tinubdan ug mga plataporma, nga ma-access pinaagi sa opisyal nga mga link ug social media handle sa ahensya.  (ECB/PIA7 Bohol)