SAN JOSE, Antique (PIA) -- Ginplastar ni Antique Lone District Rep. Antonio B. Legarda, Jr. ang ana mga binuhatan sa una nga anom ka bulan kang ana termino sa pagka-kongresista kag ginsiguro sa publiko ang tayuyon nga pagserbisyo.
Sa sangka programa sa radyo kang Enero 18, ginpabugal ni Cong. Legarda ang ana hinimuan sa Kongreso kung sa diin ana ginduso ang 154 ka mga hagna nga ginalakipan kang House Bill (H.B.) No. 3417 ukon “One Town, One Product Philippines Act” kag H.B. 2603 ukon ang “Pangkabuhayan Act.”
Dugang pa ni Legarda, suportado na ang mga magagmay nga negosyante, gani ana gid ginatinguhaan nga makasumite kang mga hagna para sa anda kaaraydan.
Pira pa sa mga hagna nga ana gina-duso amo ang H.B. 1845 ukon “One Student, One Tablet Act,” H.B. 1969 ukon “Magna Carta of Private School Teachers,” kag H.B. 1970 ukon “Magna Carta of Public School Teachers.”
Ginhambal na man nga kinahanglan protektaran ang mga duna nga manggad kay dya may bahol nga papel sa ekonomiya kang pungsod, gani ana ginaduso ang H.B. No. 2604 ukon ang “Philippine Ecosystem and Natural Capital Accounting System.”
Suno man sa kongresista, nagbulig patigayon ang ana opisina kang P477
milyones nga bulig para sa pira ka mga kabanwahanan paagi sa Local Government Support Fund (LGSF) kang Department of Budget and Management (DBM), P99.5 milyones para sa 43,521 nga benepisyaryo kang Assistance to Individuals in Crisis Situation (AICS), kag P61.5 milyones para sa 30,367 ka indibidwal sa idalom kang Department of Labor and Employment (DOLE)-Tulong Panghanapbuhay sa Ating Displaced/Disadvantaged Workers (TUPAD) program.
Nakakita man si Cong. Legarda kag si Senate President Pro Tempore Loren Legarda kang P300 milyones nga budget para sa pagpatindog kang bag-o, mas taas, kag mas lapad nga Paliwan Bridge, samtang gamiton sa pagpakay-ad kang naguba nga parte kang taytay ang P91 milyones nga para daad sa retrofitting.
Pareho nga ma-umpisa kadya nga tuig ang pagkay-ad kang Paliwan Bridge kag ang pag-ubra kang bag-o nga taytay.
Para sa 2023, tuyo ni Cong. Legarda nga ipabugal sa kadam-an ang kanami kang Antique para mapasangkad ang turismo, paduruhon ang benepisyaryo kang Commission on Higher Education (CHED)-Tulong Dunong Scholarship, magtukod kang Wi-Fi sites sa mga marayo nga barangay sa bulig kang Department of Information and Communications Technology (DICT) kag iban pa.
Para man sa pagkilala kang ana mga binuhatan para sa probinsya, ginpasalamatan kang baguhanon nga pulitiko ang publiko para sa 90% nga job performance rating sa ginpatigayon nga survey kang RP-Mission and Development Foundation, Inc. (RPMD). (AAL/BPS/PIA Antique)
