TAGBILARAN CITY, Bohol, Jan. 24 (PIA) -- Kasamtangan nga suwayan sa Department of Science and Technology (DOST) ang kalaki sa bag-ong electric boat nga namugna, ang labing una nga production class sa nahisgutang mga sakayan nga ginama sa Pilipinas.

Ang SESSY e-Boats kabahin sa alternative fuels and technology roadmap sa nasud alang sa 2018-2040 ug gisugdan sa pagpahiluna ang desinyo niini sa tinabangay sa DOST, Department of Energy (DOE) ug sa Mapua University research team sa Manila, matud pa ni Secretary Renato Solidum.

Ang Sessy e Boat nangahulugan og Safe and Efficient Sustainable Solar-assisted System plug in Electric Boat nga usa  ka research development project sa Mapua University (MAPUA U)  ug gipundohan sa DOST Philippine Council for Industry, Energy, and Emerging Technology Research and Development (DOST-PCIEERD), gipadagan sa electronics mao nga walay gasoline nga gikinahanglan, aron makatabang sa paglimpyo sa kalikopan, ug labaw sa tanan, local ang paggama, pasabut sa kalihim.  

Ang paggama sa electric boat, nakakuhag inspirasyon sa pagpa-ubos sa kahugaw sa hangin, gawas pa nga makapasayon sa pagbyahe sa nasud nga napalibotan sa mga dagat.

Hinuon, matud sa project manager sa Mapua University mao ang pagkarga sa mga pasahero, sa mga pangturismo nga gamit, ug suporta sa  mga panginahanglan sa mga local government units (LGUs), saysay ni Engr. Febus Reidj Cruz.

Sa kasamtangan nga design, kaya niini mokarga og 12 ka tawo, ug tungod kay migamit sa electric nga motor, inay fuel tank, karga niini ang batteries sulod sa compartment, dugang pasabut ni Cruz.

Uban sa mga teknolohiya nga anaa sa Sessy E-boat, gawas nga full electric power ug dili hybrid, mogamit kini sa standard electric charging, may solar assist sa battery pinaagi sa solar panels, may automatic steering alang sa semi autopilot operations ug inset nga automatic identification system. 

Ang Sessy E-Boat full charging mokabat ngadto sa tulo ka oras aron mapuno ang iyang baterya ug kon isaksak, mogasto kini og mga P300 alang sa 36 kilometros nga kalay-on byaheon sa 8.5 knots nga gikusgon.

Kon itandi sa ordinary nga bangka de motor, kini katumbas sa P2,700 nga tubil.

Karon, ang labing una nga mga Sessy E-Boats suwayan sa Laguna Lake, apan matud pa sa Mapua University project team leader, pwede na sila mohimo niining mga Bangka alang sa mga LGUs ug mga panginahanglan sa nasud. (RAHC/PIA7 Bohol)