Georgia

No. of :

No. of Shares:

Currently viewed by: Marcus Rosit

San Jose, Antique nakabaton kang pagkilala sa mayad nga pagdumara

SAN JOSE, Antique (PIA) -- Ginpabugal ni Mayor Elmer C. Untaran ang mga pagkilala nga nabaton kang dya nga munisipyo sa mayad nga pagdumara nga ginalakipan kang Seal of Good Local Governance (SGLG) kag Excellence in Local Governance (EXCELL) awards.

Hambal ni Untaran, ika-lima ron ka beses nga ginkilala ang San Jose de Buenavista bilang sangka national passer sa SGLG award – ang pinkamataas nga dungog nga ginagawad kang Department of the Interior and Local Government (DILG) sa mga Local Government Units (LGU).

Ang dya nga pagkilala nagapamaan nga ang Munisipyo kang San Jose de Buenavista may mayad nga pagdumara sa disaster preparedness, social protection, youth development, business friendliness, turismo kag kultura, duna nga manggad, ikaayong lawas, edukasyon, pinansyal nga administrasyon, kag kalinong kag katawhay.

Ang SGLG award may kaimaw man nga P5 milyones nga Incentive Fund Subsidy nga pwede magamit kang lokal nga gobyerno sa mga proyekto pang-imprastraktura.

Nakabaton man kang nasambit nga pasidungog ang mga banwa kang Barbaza, Patnongon kag Sebaste, kag ang probinsya kang Antique sa kabilugan.

Sara man ang San Jose de Buenavista sa mga ginkilala kang DILG Region 6 sa ginpatigayon nga 2022 Excellence in Local Governance Awards (EXCELL) kung sa diin napili-an ang banwa nga 1st Runner-up sa Best Performing 1st-3rd Class Municipality nga kategorya, kampyon sa Public Safety, Peace and Order, kag Social Governance, 1st Runner-up sa Administrative Governance, Economic Governance, kag Local Legislation, kag 2nd Runner-up sa Environmental Governance.

Hambal ni Untaran, ang mga kadalag-an kang anda banwa ang bangod sa dedikasyon, pagpangabudlay, kag pagburuligay kang mga opisyal kag empleyado kang anda munisipyo.

Sa sangka radio interview kang Enero 25, ginhambal man kang opisyal ang pira sa mga mayad nga binuhatan kang ana administrasyon, kaangay kang pagbutang kang Closed Circuit Television (CCTV) sa mga dalan, pag-improbar kang trapiko, pagbukas kang bag-o nga Sanitary Landfill, pagsara kang open dumpsite kag pagbutang kang tree park, ang pagpatindog kang San Jose Business Park Annex Building kag iban pa.

Ginpasalamatan man ni Untaran ang publiko para sa anda padayon nga pagsarig kag ginsiguro ang padayon nga pagserbisyo kag mayad nga pagdumara sa banwa kang San Jose de Buenavista.

Ana man gin-agda ang mga Antiqueño nga magrehistro kang anda SIM ukon Subscriber Identity Module sa pagsunod sa Republic Act. No. 11934 ukon ang SIM Registration Act nga nagatuyo protektaran ang publiko sa mga scam kag iban pa nga mga pagpangloko. (AAL/BPS/PIA Antique) 

About the Author

Bernard Ceasar Susbilla

Information Officer I

Region 6

Electronics Engineer/Writer

Feedback / Comment

Get in touch