CAMIGUIN (PIA)--Padayon sa paghatag og panginabuhian para sa 355 nga nawalaan ug trabaho, mga wala'y insakto na trabaho, ug mga seasonal workers ang Department of Labor and Employment (DOLE) Camiguin Provincial Office gipahigayon ang Tulong Panghanapbuhay sa Ating Disadvantaged/Displaced Workers (TUPAD) orientation, Enero 25, sa gymnasium sa Sagay. 

"We are now in the Municipality of Sagay with 355 beneficiaries ang atong gi-orient and then kani siya is 15 days, 3 hours and 4 minutes nga employment. Ang iyang rate ani is P390 since na-approve man siya ang proposal last December before pa nag-start ang new minimum wage," matod pa ni Jovelyn Perez sa DOLE Camiguin.

Dugang pa niya nga paghuman sa employment period (Pebrero 1-18), kada benepisyaryo mudawat ug P6,000 nga cash. 

Usa sa benepisyaryo, Romel Castañares, 42, usa ka mag-uuma nga nagpuyo sa Barangay Bacnit, ikaduha na higayon nga benepisyaryo sa TUPAD, ang miingon nga mapasalamaton siya sa higayon nga gihatag sa iya, tungod kay iyang daan nga sweldo dili makasustento sa pang-adlaw-adlaw nga kinabuhi. 

"Katong una nako nga pagkadawat, dako kaayo og ikatabang sa pag-eskwela sa akong anak kay nahimo ni nilang allowance didto sa pag-eskwela, pambayad sa boarding house, allowance kada semana ug dako na kaayo og ikatabang para sa ako," matod pa ni Castañares. 

Daghang mga residente sa Camiguin ang makabenepisyo sa programa, sa dihang ang DOLE-Camiguin ipahigayon gihapon ang orientasyon ug ang pagpirma sa kontrata para sa mga benepisyaryo sa Guinsiliban, uban sa 127 ka benepisyaryo, Mahinog (393), ug Mambajao (953). 

Si Sagay Mayor Richard Uayan nagpaabot usab saiyang pagpasalamat sa DOLE ug ang probinsyal na gobyerno sa pagtubag sa panginahanglan sa ilang mga lumulupyo labi na sa Barangay Mayanan, Cuña, Balite, Manuyog, Bugang, Bacnit, Alangilan. (RTP/PIA-10/Camiguin)