CAMIGUIN (PIA)--Isip tubag sa panginahanglan sa mga pamilya nga naapektuhan pag-ayo sa pandemya sa COVID-19, ang Department of Labor and Employment (DOLE)-10 nagpahigayon sa Tulong Panghanapbuhay sa Ating Disadvantaged/Displaced Workers (TUPAD) payout ngadto sa 514 nga benepisyaryo gikan sa 10 ka barangay sa lungsod, Marso 10.

Mikabat sa kinatibuk-ang P3.84 milyones ang nahatag ngadto sa mga benepisyaryo gikan sa Barangay Magting, Tagdo, Naasag, Yumbing, Anito, Kuguita, Benhaan, Tupsan, Bug-ong, ug Agoho. Matag usa kanila nakadawat og P6,000 gikan sa DOLE.

"Ang pakiusap lamang ng aming kalihim, ang aming programa ay para sa lahat, ang aming budget na nakalaan ngayong taon ay para sa lahat. Gagamitin lang natin siya sa tamang paraan," giingon ni DOLE Undersecretary Benjo Santos Benavidez.

(Ang hangyo lang sa atong secretary nga para sa tanan ang atong programa, ug ang atong budget nga gigahin karong tuiga para sa tanan. Gamiton lang nato siya sa saktong paagi)

Posible kini kung magtinabangay ang mga kagamhanang munisipyo ug probinsiyal, matod niya, nga ginganlan sila Rep. Jurdin Jesus Romualdo ug Gob. Xavier Jesus Romualdo isip maayong mga kaabag sa kalamboan.

Sa bahin sa paglakip sa programa, si Benavidez miingon nga mibisita usab sila sa rehiyon aron ipahigayon ang oryentasyon sa bag-ong mga lagda ug regulasyon, o giya, sa pagpatuman sa TUPAD ug sa livelihood assistance sa departamento.

Matud pa niya nga pinaagi sa bag-ong guidelines, mas sayon ang pag-avail sa mga programa sa departamento nga adunay gamay nga documentary requirements nga matuman.

Sa iyang bahin, giawhag ni Mayor Yñigo Jesus Romualdo ang mga benepisyaryo nga tabangan gihapon ang lokal nga kagamhanan sa pagmintinar sa kalimpyo sa lungsod bisan pa man nga humana ang ilang trabaho sa TUPAD.

"Dako kaayo siya og ikatabang sa amo, labi na nga wala’y sakto nga pangita. Para sa among daily needs, para sa akong anak, sa iyang panginahanglanon. Mapasalamaton ko sa DOLE kay natabangan gyud ko niya sa pang-adlaw-adlaw nga daily needs," matod sa usa sa mga benepisyaryo nga si Joyce Banac, 21, nga taga Barangay Magting.

Ang mga delegado sa DOLE nga gilangkuban nila Benavidez, Usec. Felipe Egargo, Jr., Asec. Lenard Serrano, ug Regional Director Albert Gutib mipadayon sa Barangay Mahinog alang sa pag-turnover sa livelihood assistance nga adunay P150,00 badyet ngadto sa Mahinog Market Vendors Association nga adunay 28 ka miyembro. (RTP/PIA-10/Camiguin)