SYUDAD SANG ILOILO (PIA) - - Masobra sa P42.8 bilyones ang ginpain nga pundo para sa mga banner food security programs sa idalum sang 2023 General Appropriations Act (GAA) bilang pasalig sang administrasyon ni Presidente Ferdinand R. Marcos Jr. nga pabaskugon pa ang agrikultura kag mabag-o ini agud mangin isa sa mayor nga drivers sang pagtubo kag empleyo.
Ini nga mga programa sang Department of Agriculture (DA), nga nagalakip sang National Rice Program, National Corn Program, National Livestock Program, National High-Value Crops Development Program, Promotion and Development of Organic Agriculture Program kag National Urban and Peri-Urban Agriculture Program, nagatuyo nga masabat ang seguridad sa pagkaon, mapahaganhagan ang kaimolon, kag tayuyon nga pag-umwad pinaagi sa dugang nga kita sa ulumhan kag mangin produktibo.
Pahayag ni Department of Budget and Management (DBM) Secretary Amenah F. Pangandaman nga sa pila na ka beses ginahatagan punto ni Presidente Marcos Jr. nga ang agrikultura ang isa sa nagapanguna nga prayuridad sang iya administrasyon. Bangud sini, ang 8-point socio-economic agenda sang DBM ang natuhoy sa seguridad sa pagkaon kag agricultural output.
Suno kay Pangandaman, ini ang rason nga ginsiguro sang DBM nga ang mga importante nga programa nga nagatuyo sa pagpataas sang kita kag produksyon sa panguma ang mahatagan sang nagakaigo nga pagtamod.
Ang National Rice Program (NRP), ang may kaangtanan sa panguma kag pagpasanyog sang kabuhi sang mga mangungumang Filipino, ang ginpainan sang P30.30 bilyon sa idalum sang 2023 nasyunal badyet. Gindoble sini ang ginpain para sa produksyon sang palay pinaagi sa NRP humalin gid lamang sa P15.78 bilyones sang 2022.
Ang National Corn Program nga nagatuyo nga madugangan ang produksyon sang kalidad nga mais kag balinghoy para sa konsumo sang tawo, bubod kag gamit industriyal kasubong man nga empower ang mga mangunguma kag mapataas ang ila kita, may P5.02 bilyones nga badyet sin inga tuig.
Ang National Livestock Program nga ang tinutuyo mapadasig ang kasanyugan sang sektor sang poultry kag livestock pinaagi sa pagpaayo sang produksyon kag mapataas ang profitability sang mga tagsakdag may yara nga P4.50 bilyones nga badyet.
Kabilugan nga P1.80 bilyones ang ginpain para sa National High-Value Crops Development Program gina-implementar agud magbulig sa pagpalapnag sang produksyon, pagproseso, marketing kag distribusyon sang high-value crops.
Ang Promotion kag Development sang Organic Agriculture Program may P900 milyones nga badyet para sa 2023. Tinutuyo sang programa nga mapalapnag, mapamuad kag labi pa mapasanyog kag ma-implementar ang practice sang Organic Agriculture sa pungsod.
Samtang, ang National Urban and Peri-Urban Agriculture Program ang ginhatagan sang P318.47 milyones sa idalum sang 2023 GAA. In inga programa magapalapnag sang urban kag peri-urban agriculture kag iban pa nga magtuhaw nga practices sa agrikultura kasubong sang Plant, Plant, Plant program. (JBG/DBM/laf/PIA6-Iloilo)
