DAVAO CITY (PIA) - Ang Opisina sa Bise Presidente naglaraw nga dugangan nga gidaghanon sa mga satellite office nga ibutang sa lain-laing mga bahin sa nasud.

Matod pa ni Atty. Raymond Munsayac, tigpamaba sa buhatan sa Bise Presidente, karong tuiga duha ka satellite office ang ibutang sa Bicol Region, dayon isunod ang pagbutang sa Isabela sa Northern Luzon.

Gawas sa mga satellite office nagtukod usab sila og mga public assistance extension office aron matubag ang panginahanglanon sa publiko.

“Daghan na og planong ibutang na mga public extension offices. Ang tuyo namo nga butangan sa mga lugar nga talagsaon lang  maabot sa mga ahensya sa gobyerno kay layo man,” dugang pa ni Munsayac.

Ang Buhatan sa Bise Presidente adunay pito ka mga satellite office nga nahimutang sa Bacolod City, Tanday sa Surigao del Sur, Davao City, Cebu, Tacloban, Dagupan, ug Zamboanga.

Sa pagkakaron padayon ang OVP sa pagtunol og hinabang sa mga nanginahanglan sama sa medical assistance, garantiya sa tambal, ug burial assistance, gawas  sa hinabang gikan sa  mga local government unit. (PIA/ETIsidro)