TAGBILARAN CITY, Bohol, March 16 (PIA) -- Nakig-alayon ang Department of Migrant Workers (DMW) sa Department of Justice (DOJ) ug ubang ahensya sa gobyerno aron pakusgon ang ilang paningkamot batok sa human trafficking nga nangbiktima sa mga overseas Filipino workers (OFWs).

Sa press release nga gipagawas niadtong Martes, Marso 14, si DMW Kalihim Susan "Toots" Ople miingon nga si Presidente Ferdinand R. Marcos Jr. ang personal nga nangulo sa Inter-Agency Council Against Trafficking (IACAT) meeting nga gipahigayon niadtong Lunes sa Palasyo sa Malacañang.

Atol sa maong meeting, gitaho sa Presidente nga ang DMW nagtabang sa mga biktima sa mga sindikato sa crypto-currency sa pagpasaka og kaso sa human trafficking.

Matud pa ni Ople nga may napasakaan na og onse (11) ka kaso sa trafficking-in-person ug may upat pa ka kaso nga gitakdang ipasaka sa mosunod nga duha ka semana.

Gidugang usab sa kalihim nga usa sa mga akusado sa crypto-currency scam nga nakabiktima sa mga OFW sa Cambodia nasikop niadtong Marso 7 sa syudad sa San Fernando, lalawigan sa Pampanga.

Samtang gipasalig usab ni Ople sa Presidente nga hugot nga gimonitor sa DMW ang mga taho sa human trafficking sa mga OFW sa Poland ug sa ubang bahin sa Europe diin ang mga trabahante gipailalom sa taas nga oras sa trabaho, ubos nga sweldo, ug dili luwas nga kahimtang sa trabaho.

Matud pa ni Ople nga ang DOJ nipadayag og kaandam nga motabang niining mga biktima sa human trafficking gikan sa gawas sa nasud kinsa determinado nga mopadayon sa mga kasong kriminal pinaagi sa Witness Protection Program.

Ang DMW makigtambayayong pag-ayo sa Presidential Communications Office (PCO), Department of Information and Communications Technology (DICT) ug uban pang buhatan sa gobyerno sama sa DOJ ug IACAT alang sa mas gipakusog nga kampanya sa edukasyon ug kahibalo, matud pa ni Ople. (ECB/PIA7 Bohol)