DAVAO CITY (PIA) – Napulo ka mga Dabawenyo ang nakadawat og mountain bike nga gi apud-apod sa mga kwalipikadong trabahante ug mga individwal atol sa gipahigayong Flag raising ceremony atubangan sa City Hall.

Matod pa ni Davao City Councilor Tek Ocampo sa unang distrito nga mao mismo ang nanguna sa pag apud-apod nga ang mga mountain bike gi-sponsoran sa  Ayala Foundation, Makati Business Club ug  Grab ubos sa Wheels for Work  Program.

Dugang pa ni Ocampo, gawas sa upat ka mga empleyado sa City Hall, nakadawat usab ang duha ka balut vendors, usa ka fish vendor, usa ka single parent, working student,  ug carpenter/painter.

Tumong sa maong pag apud-apod aron mahatagan og means of transportation ang mga less fortunate nga individual nga naningkamut aron makatrabaho ug naay panginabuhian.

“Ang pagpili sa mga binipersyaryo sa maong proyekto, gi-adtuan nato ni isa-isa ang mga aplikante, gitan-aw ang ilang kahimtang kung deserving ba gyud. gitan-aw nato if need ba gyud nila og bisekleta for transportation sa ilang panginabuhian,” dugang pahayag ni Ocampo.

Anaa sa kapin o kulang 100 ka mga aplikante ang na-screen.

Ang matag bike nagkantidad og gibana-bana nga Php15,000, lakin ang accessories sama sa helmet.  

Ang matag binipersyaryo nipirma og kontrata nga dili nila mabaligya ang biseklita sulod sa usa ka tuig. (PIA/ETIsidro with report from CIO)