TAGBILARAN CITY, Bohol, Feb. 8 (PIA) -- Nipasalig si Presidente Ferdinand R. Marcos Jr. sa mga Filipino health worker nga ang administrasyon magpadayon sa paghatag sa ilang mga benepisyo bisan pa sa pagtangtang sa state of health emergency sa nasud tungod sa COVID-19 pandemic.

“Kahit hindi itinutuloy ang state of calamity ay hindi maapektuhan ang pagbayad doon sa ating mga health workers ng kanilang mga benefits,” pasalig pa ni Marcos human sa meeting kauban sa mga health officials sa Malacañang.

Ang Presidente mitaho usab nga ang COVAX Facility nagpadala ug 1.3 milyones nga doses sa mga bakuna sa Pilipinas nga igo na alang sa nasud sa pagkakaron. Gitataw niya nga adunay pagkunhod sa gidaghanon sa mga impeksyon ug pagka-ospital sa nasud kun itandi sa miaging mga tuig.

“Hindi na kailangan kagaya ng 2021 na lagi tayong nagmamadali makakuha ng vaccine dahil pabawas na ‘yung risk, so dapat naman eh mag-adjust din tayo doon sa kung ano ba talaga ang scientific na assessment doon sa sitwasyon ng COVID,” matud pa sa Presidente.

Samtang ang Department of Health (DOH), atol sa National Economic Development Authority (NEDA) Philippine Development Plan (PDP) Forum alang sa 2023-2028 naglatid sa mga mahinungdanong aksyon sa ahensya aron mabatukan ang nag-unang isyu sa sektor sa panglawas.

Ang vision sa Health Sector Strategy alang sa 2023-2028 naghatag gibug-aton sa mahinungdanon nga mga sangkap nga nagpasiugda sa upat ka dagkong mga haligi sa balangkas: 1) Usa ka katilingban nga nagpasiugda sa pisikal, mental, ug sosyal nga kaayohan; 2) Paghatag ug gahom sa mga komunidad ug panimalay sa paghimog himsog ug may kahibalo nga mga pagpili; 3) Paghatag og akses sa publiko ug pribado nga mga sistema sa paghatod sa pag-atiman sa panglawas; ug 4) Pag-capacitate sa mga lakang aron mapalig-on ang sistema sa kahimsog sa pagsuporta sa uban pang mga sangputanan.

Uban niini sa hunahuna, ang DOH karon nagtinguha sa pagkab-ot sa upat ka dagkong estratehikong resulta: 1) Pagpauswag sa sosyal nga determinant sa kahimsog; 2) Makapahimo sa himsog nga mga pagpili ug pamatasan; 3) Pagpauswag sa akses sa mga Pilipino sa kalidad ug episyente nga pag-atiman sa panglawas; ug 4) Pagpalig-on sa mga sistema sa kahimsog sa nasud.

Ang pagpalapad ug pagpalig-on sa sistema sa pag-atiman sa kahimsog sa nasud usa sa 10-point priority agenda sa kasamtangang administrasyon aron mahatagan ang labi ka luwas ug himsog nga komunidad sa matag Pilipino. (ECB/PIA7 Bohol)