MALAYBALAY CITY (PIA)--Pinaagi sa Project ProtecTEEN, sa pakigtambayayong sa Malaybalay City local government unit (LGU), gisugdan na sa Department of Social Welfare and Development (DSWD) ang ‘emotional and psychological restoration’ alang sa mga batan-on nga sayo nahimong inahan.  

Base sa pinakabag-o nga data, ang Malaybalay City nalakip sa top five cities nga dunay pinakataas nga teenage pregnancy cases. Subay sa rekord, naa sa 591 ka mga babaye ang sayo nga nanganak.  

Gisugilon ni ProtecTEEN Project Team Leader Jelie Barceta sa DSWD Central Office ngadto kang Field Office-10 Assistant Regional Director for Operations Ronald Ryan Cui nga ang iyang team mohatag og psychosocial support sa 21 ka mga teenage moms sa syudad.

Ang unang batch sa mga batan-ong inahan nga nag-edad og 10 ngadto sa 19 anyos mopailawom sa proseso sulod sa lima ka adlaw uban sa hugot nga koordinasyon sa Social Technology Unit sa DSWD-10 Field Office ug mga personahe sa Malaybalay LGU.  

Gilusad sa Malaybalay ang Project ProtecTEEN niadtong Agosto 10, 2022 aron mahatagan og psychosocial nga suporta ug uban pang interbensyon ang mga batang sayo nahimong inahan.  

Ubos sa programang Social Protection for Adolescent Mothers and their Children, kining Project ProtecTEEN makatabang sa mga Teen Mothers diha sa pagmatuto sa bata, labi na ang kahibalo sa ilang responsibilidad isip inahan ug sa paggiya sa ilang mga anak aron mahimong maayong ehemplo sa katilingban. (BGE/PIA-Bukidnon)