KALIBO, Aklan (PIA) --  Ro Aklan hay nagapabilin nga sangka probinsya nga nakasandig sa agrikultura nga may mapagsik nga industriya it turismo, suno kay Governor Jose Enrique Miraflores sa anang pag-abi-abi kurundaya eamang sa mga opisyales ag miyembro it Regional Development Council (RDC) VI sa ginhiwat nga 1st Quarter Full Meeting kara sa isla it Boracay.

Ginsugid ni Governor Miraflores sa mga nag-atender it RDC nga naghalin pa sa mga probinsya it Negros Occidental, Iloilo, Capiz, Antique ag Guimaras, nga ro isla it Boracay hay balik eon sa normal kon siin paagi sa pagbueuligan it mga ahensya nga nasyonal ag lokal, pribado nga sektor, sosyedad sibil ag media, amat-amat eon ra nga nakakabangon halin sa epekto it pagsarado kara ag pagrehabilitar, ag sa pandemya.

Bangud kara, padayon ro pagtao it bulig it probinsya sa mga mangunguma agud mangin abu ro mga patubas, imaw man ro paghanas paagi sa agri-aqua demonstration farm ag training center sa Barangay Nalook, Kalibo, Aklan nga makaron hay sertipikado eon bilang ‘learning site for agriculture’ it Department of Agriculture – Agricultural Training Institute (DA-ATI).

Sa makaron, ro Aklan Grains Processing Center nga una man sa Barangay Nalook hay naga operar eon, ag nagabakae it paeay halin sa mga mangunguma sa rasonable nga presyo nga ginaeauman nga makabalanse it presyo it paeay sa probinsya.

Ro RDC Meeting nga ginhiwat sa Hennan Palm Beach Resort sa isla nga ginsakdag it Aklan hay ginpamunuan ni RDC Chairperson Hon. Alfredo Abelardo B. Benitez, mayor it Bacolod City.

Idto man sa nasambit nga meeting sanday Secretary Terence Calatrava it Office of the Presidential Assistant for Visayas (OPAV), ag si USEC Mark Cristeo R. Geminez it Presidential Management Staff (PMS). (JBG/VGV/PIA6 Aklan)