TUGUEGARAO CITY, Cagayan (PIA) - - Ibinahagi ng Philippine Veterans Affairs Office (PVAO) ang mga pension at non-pension benefits ng mga beteranong nagsilbi noong World War II at pagkatapos ng digmaan, at mga retirado mula sa Armed Forces of the Philippines bilang pagkilala at pagbibigay halaga sa kanilang serbisyo sa bayan.

Ayon kay Muriel Eugenio-Viernes, head ng Service at Extension Office ng PVAO, mayroong tatlong klase ang pension benefit na maaring ma-avail ng mga ito.

Kabilang sa mga ito ay ang old age pension kung saan buwanang makakakuha ng P20,000 ang mga retiradong beterano samantalang P5,000 para sa mga post-war veterans.

"Maaring ma-avail or mag apply ang mga ito simula ika-65 na kaarawan o pagkamatay ng beterano," ayon kay Viernes.

Dagdag nito, mayroon ding disability pension para sa mga beterano na natanggal sa serbisyo dahil sa sakit, sugat, o pinsalang natamo habang ginagawa ang kanilang tungkulin.

Kabilang din sa nasabing pension ay ang death pension kung saan maaring asawa ng yumaong beterano ang mag claim nito.

Sa kabilang banda, dagdag sa benepisyong hatid ng PVAO ay ang non-pension benefit na kinabibilangan ng burial assistance na nagkakahalaga ng P20, 000, kasama ang pagkakaloob ng Philippine flag.

Mayroon ding educational assistance para sa isang anak ng mga beterano na nagkakahalaga ng P40,000 kada taon. Gayonman, nilinaw ni Viernes na tanging ang mga nag-aaral lamang sa public school ang maaring maka avail ito.

Dagdag pa rito mayroon ding hospitalization and health care benefit na maaring i-avail ang asawa at anak ng mga beterano sa pamamagitan ng reimbursement sa mga medical bills na kanilang mga nagastos.Kabilang din sa mga ipinagkakaloob ng PVAO ay ang mga ampulatory devices tulad ng wheelchair, canes, at walker.

Samantala, nagbigay paalala si Viernes na kung mag aapply para sa nasabing mga benepisyo ay mabuting miyembro na lamang ng pamilya ang magproseso nito para masigurado na matatanggap nilang buo ang benepisyong para sa kanila dahil hindi maikakaila ang mga presenya ng fixers sa panahon ngayon. (OTB/PIA Region 2/Maryjoy Javier)