SAN JOSE, Antique (PIA) -- Ginpa-athag kang Philippine Veterans Affairs Office (PVAO) Field Extension Office sa Iloilo City ang nagkalain-lain nga benepisyo kag serbisyo nga sarang mabaton kang mga beterano kag andang pamilya.

Hambal ni PVAO Iloilo Officer-In-Charge Glen E. Castañares, ang mga senior veterans ukon mga beterano nga nag-serbisyo kang World War II kag post-war veterans ukon mga retirado halin sa Armed Forces of the Philippines (AFP) ang pwede makabaton kang pension kag non-pension nga mga benepisyo.

Ang mga benepisyaryo kang napatay nga beterano makabaton man kang death pension nga P1 ka libo kada bulan, samtang ang mga beterano nga naga-edad 70 pataas ang ginakabig ron nga totally disabled kag makabaton kang P1,700 kada bulan sa idalom kang Total Administrative Disability (TAD) Pension.

Para sa non-pension benefits, may educational assistance, burial assistance kag ang VHMCP ukon Veterans Memorial Medical Center (VMMC) Hospitalization and Medical Care Program.

Kada sara ka beterano ang pwede makabaton kang sara lang gid nga educational benefit nga indi maglampas P40 mil kada tuig sa sulod kang 4 ka tuig, samtang ang burial assistance naga-balor P20 mil kag may abay nga bandera kang pungsod Pilipinas nga ibutang sa lungon kang napatay nga beterano.