No. of :

No. of Shares:

Currently viewed by: Marcus Rosit

Government Center igapatukod sa Probinsya kang Antique

SAN JOSE, Antique (PIA) -- Ang Provincial Government kang Antique ang naghiwat kang “groundbreaking rites” kasan-o gid lamang para sa pagpatukod kang government center sa Barangay Badiang, San Jose de Buenavista, Antique.

Dya ginpangunahan ni Governor Rhodora J. Cadiao kaimaw sanday Vice Governor Edgar Denosta, Antique Lone District Representative Antonio Agapito Legarda, miyembro kang Sangguniang Panlalawigan, kag iban pang lokal nga opisyales.

Ang opisina ni Vice President Sara Duterte-Carpio nagtambong man sa amo nga programa paagi sa representasyon ni Dr. Christopher G. Sorongon, Officer-In- Charge kang Office of the Vice President Satellite Office sa Bacolod City.


Ang dya nga government center suno kay Governor Cadiao may kantidad nga P970 milyones nga pondo halin sa sinuptan kang gobyerno probinsyal kang mga nagliligad nga tinuig.

Sangka bahol dya nga kantidad hambal ka Gobernador nga wara gin-utang ang ana administrasyon, gani ana ginpasalamatan ang mga miyembro kang local finance committee sa pagtipon kag pagdumara ka husto kang pondo ka gobyerno probinsyal.

Sa dya nga edipisyo makita ang mga opisina kang gobyerno probinsyal kag mga opisina kang nasyonal nga ahensya, agud nga mas mahulas kag madali ang pagtransaksyon kang publiko kun may kinahanglan nga serbisyo kang gobyerno.

Ginhambal man ni Cadiao nga sa amo man nga petsa katong Abril 28, 1957, mga 66 ka tuig ang nakalipas kang ang ana tatay nga si anay Governor Josue L. Cadiao nag-umpisa kang pagpatukod kang bag-o nga Kapitolyo sa probinsya kun sa diin makita ang mga opisina kang provincial government kadya.


Ana gindugang hambal nga sa sulod kang 66 ka tuig, ang Antique nangin “Rising Star” run kang Western Visayas gani nga kinahanglan na run ang bag-o kag manami nga opisina.

Ang Government Center ipatukod sa 6.4 hektarya nga lupa, ginabakal sa kantidad nga P110.7 milyones kang provincial government.

Sa sangka press conference, si Provincial Administrator kag anay Judge Nery Duremdes naghambal nga ang pag-bid paga-umpisahan run, samtang ang pagpatindug kang edipisyo ginabanta nga matapos sa sulod kang darwa ka tuig.

Samtang ang Provincial Information Office, nagsugid nga ang dya nga edipisyo maga-gamit kang solar energy. (AGP/PSM/PIA-Antique with reports from JSC-UA Intern)

About the Author

Pilar Mabaquiao

Writer

Region 6

Feedback / Comment

Get in touch