TAGBILARAN CITY, Bohol, April 26 (PIA) -- Angay nga mas daghang Pilipino ang makakuha sa ilang COVID-19 booster doses taliwala sa pagsaka sa mga kaso sa nasod, matud pa sa usa  ka opisyal sa Department of Health (DOH).

Base sa datos sa departamento, nakatala ang Pilipinas og 3,148 ka kaso sa COVID-19 niadtong niaging semana.

Gikan Abril 17 hangtod 23, ang average nga 450 daily infections ang natala sa nasod nga 32 porsyento nga mas taas kun itandi sa milabay nga semana.

Sa usa pa pahayag, si DOH Epidemiology Bureau Director Dr. Alethea De Guzman nagkanayon nga kinahanglan pang palapdan ang targeted population sama sa mga senior citizen tungod kay 82 porsyento pa lamang kanila ang fully vaccinated, ug 30 porsyento pa lamang sa target population ang nakadawat og booster.

Matud pa ni De Guzman nga ang omicron subvariant nagpabiling nag-una o predominant nga variant sa Pilipinas.

Gilambigit niini ang pagsaka sa mga kaso, apil na usab ang pagsaka sa morbidity.

Giingong usa  sa mga hinungdan sa pagsaka ang bag-o pa lamang natapos nga Semana Santa.

Ning bag-o lang, gilagdaan sa DOH ang usa  ka set sa guidelines alang sa paggamit sa ikaduhang COVID-19 booster sa kinatibuk-ang populasyon.

Kauban sa mga angay nga makadawat sa ika-upat nga bakuna ang bisan kinsang labaw sa 18 anyos ang edad, mga buntis ug nagpasusong kababayen-an, ug mga indibidwal nga immune compromised. (ECB/PIA7 Bohol)