DAET, Camarines Norte, Mayo 15 (PIA) – Nagsanay ang mga kawani ng Bureau of Jail Management and Penology (BJMP) sa Camarines Norte ng kaalaman at pamamaraan sa pagtatanim, pagpapatubo ng halaman na walang ginagamit na lupa partikular na ang lettuce.

Ang naturang training ay naisagawa sa  pamamagitan ng isang araw na appreciation course sa Hydroponics at Aquaponics ng Technical Education and Skills Development Authority (TESDA) at ng Urban Gardening and Agricultural Technologies (UGAT) Integrated Farm na isang non-government organization (NGO) na nagbibigay ng mga kaalaman sa larangan ng agrikultura.

Ang Aquaponics naman ay mga halaman na lumaki sa grow bed at ang mga isda ay inilalagay sa tangke, ang tubig mula sa tangke ng isda ay gagamitin naman na pandilig sa mga tanim.

Ang mga halaman ay sumisipsip ng mga nitrates at iba pang nutrients upang matulungan silang lumaki, nililinis at sinasala ng mga ugat ng halaman ang tubig bago ito dumaloy pabalik sa tangke ng isda.

Ayon kay Provincial Jail Administrator Jail Senior Inspector Ramon A. Rafer ng BJMP, matapos ang pagsasanayang ay maaari ng maisagawa ito sa mga district jail sa tulong ng TESDA at maipatupad ito sa mga piitan ng kasanayan sa pagtatanim.

Isinagawa sa pagsasanay ang tamang paglalagay ng tanim, pangangalaga, proseso ng pagpapatubo ng halaman, pagtransplant ganundin ang paggawa ng pataba o abono at alternatibong pagkain.

Layunin ng nasabing pagsasanay na bigyang kaalaman ang mga personel upang mas maging madali ang implementasyon nito sa mga piitan at mabigyang kasanayan rin ang mga PDL sa larangan ng agrikultura.  (PIA5/Camarines Norte/ ulat mula sa tanggapan ng BJMP Camarines Norte)

Ayon kay Quennie Enriquez, center admin ng Provincial Training Center ng TESDA, malaki ang makukuhang benepisyo sa pagtatanim at maaaring gamitin ito sa komunidad at sa mga Persons Deprived of Liberty (PDL) na nasa mga piitan ng BJMP.

Aniya, ito ay malaking tulong dahil hindi na nangangailangan ng malaking lugar at pwedeng magtanim kahit sa bakuran lamang ay makakapag-ani na ng sariwang gulay.

Ang Hydroponics ay isang pamamaraan ng pagpapatubo ng halaman na walang ginagamit na lupa sa pamamagitan ng mga nutrient solution samantalang ang Aquaponics ay isang kumbinasyon ng mga isda at bakterya na ginagamit upang magbigay ng mga sustansya sa mga pananim.

Sa Hydroponics, ang mga halaman ay maaaring itanim sa buong taon dahil ang mga kondisyon ng klima ay maaaring kontrolin ng paggamit ng isang greenhouse at nagbibigay daan din ito sa pagtatanim ng pagkain sa mga lugar na hindi kayang suportahan ang mga pananim sa lupa.