TAGBILARAN CITY, Bohol, May 10 (PIA) -- Ang National Irrigation Administration (NIA) ug uban pang mga kaabag sa gobyerno andam nga mohatag og tabang sa mga lokal nga mag-uuma taliwala sa nag-ung-ong nga El Niño phenomenon sa umaabot nga mga bulan.
Sa usa ka briefing sa Laging Handa niadtong Martes, si NIA acting administrator Eduardo Guillen miingon nga ang koordinasyon sa mga asosasyon sa irrigator, ang Department of Agriculture (DA), ug ang Department of Public Works and Highways (DPWH) nagpadayon.
“Inaasahan po natin na marami tayong maitutulong ngayon kung talagang papalo po itong El Niño,” pahayag pa ni Guillen.
Base sa datos gikan sa Philippine Atmospheric, Geophysical and Astronomical Services Administration (PAGASA), si Guillen nagkanayon nga ang El Niño, usa ka weather phenomenon nga moresulta sa dry spells o huwaw nga mahimong makaapekto sa Ilocos Region ug ubang bahin sa Luzon.
Namatikdan sa NIA acting administrator nga ang Mindanao dili kaayo maapektohan sa El Niño.
Aron makatabang sa pagdaginot sa tubig ug pagdugang sa abot sa umahan, matud pa ni Guillen nga usa ka sistema nga gitawag og alternate wetting ug drying ang himuon.
Matud pa niini nga mahimo madugangan og 20 porsyento ang gidaghanon sa tubig nga ipadala sa usa ka lugar kung buhaton kini ug kini moresulta sa mas taas nga abot sa mga mag-uuma.
Kini nga praktis, ingon niya, mahimo usab nga maghatag higayon sa mga mag-uuma nga makakuha og carbon credit nga nagtugot sa pagbuga sa usa ka piho nga kantidad sa carbon dioxide o uban pang mga greenhouse gas.
Sa mga dapit nga apektado sa huwaw, giingong solar-powered water pumps ang ihatag.
Sa mga worst-case scenario diin imposible ang pagtanom, gibutyag ni Guillen nga ang Department of Social Welfare and Development (DSWD) ug ang Department of Labor and Employment (DOLE) makahatag og tabang pinaagi sa ilang cash-for-work program nga Tulong Panghanapbuhay sa Ating Disadvantaged/Displaced Workers.
Ang maong mga programa makatabang sa mga mag-uuma pinaagi sa pagbayad kanila alang sa trabaho sama sa pag-desilting sa mga kanal o uban pang trabaho nga may kalabotan sa pagtrabaho.
Aron masiguro nga adunay igong suplay sa pagkaon ang nasud, siya miingon nga ang National Rice Program sa nasud andam sa paghatag sa mga mag-uuma og hybrid nga mga binhi nga doble ang abot sa inbred seeds.
Una nang gipahibalo sa PAGASA nga adunay 80 porsyento nga posibilidad sa pagtunga sa El Niño gikan sa Hunyo ug Agosto nga molungtad hangtod sa sayong bahin sa sunod tuig.
Kini nga panghitabo sa panahon nagdugang sa kalagmitan sa ubos sa normal nga mga kondisyon sa ulan nga mahimong hinungdan sa huwaw o taas nga ting-init. (ECB/PIA7 Bohol)
