TAGBILARAN CITY, Bohol, May 24 (PIA) -- Ang Provincial Disaster Risk Reduction and Management Council (PDRRMC) sa lalawigan nga gipangulohan ni PDRRM Officer Dr. Anthony Damalerio ug ang chief of staff sa Governor’s Office nga si Atty. Filipina Asoy-Piollo nga nagrepresentar ni PDRRMC chair Gob. Erico Aristotle Aumentado nipahigayon og Pre-Disaster Risk Assessment (PDRA) meeting adlaw’ng Miyerkoles, Mayo 24, 2023, isip pagpangandam sa hulga sa Super Typhoon Mawar.
Ang mga ahensya nga adunay mandato sa disaster management mitaho sa ilang tagsa-tagsa ka opisina nga protocol sa aspeto sa pagpangandam ug hiniusang nagkauyon alang sa mas lig-on nga koordinasyon ug gipasiugda ang importansya sa direktang komunikasyon ug paspas nga pagpaabot sa impormasyon.
Atol sa meeting, gitaho ni Leonard Samar sa Philippine Atmospheric, Geophysical and Astronomical Services Administration (PAG-ASA) nga sukad alas 3:00 sa buntag adlaw nga Miyerkoles, ang Super Typhoon Mawar anaa sa 2,215 km Silangan sa Visayas nga adunay 185/230kph maximum wind/gust.
Matud pa ni PDRRM Officer Damalerio, andam na ang PDRRMO ug Telephone and Radio System Integrated Emergency Response (TaRSIER) 117 nga magtukod og 24/7 Emergency Operations Center nga magdugtong sa tanang nasyonal, probinsiyal ug municipal nga ahensya sa gobyerno alang sa tibuok probinsya nga pagpangandam ug mekanismo sa pagtubag.
Gibanabana nga mosulod kini sa Philippine Area of Responsibility (PAR) sa Biyernes sa gabii o Sabado sa sayong buntag ug nganlan kini og Bagyong Betty.
Sa lalawigan sa Bohol, ang super typhoon gibanabana nga magdala sa taas ngadto sa taas kaayo nga posibilidad sa 25mm nga pag-ulan ug 70% nga posibilidad nga molapas sa 50mm nga pag-ulan sa Sabado, Mayo 28, 2023, kung kini duol sa Visayas.
Posibleng isaka ang Gale warning sa Domingo hangtod Martes nga adunay kasarangan ngadto sa kusog nga hangin ug kasarangan ngadto sa mabaluron nga kadagatan niining mga adlawa.
Ang PDRRMC anaa sa heightened alert ug makanunayon nga nagmonitor sa mga kalambuan aron sa pagmapa sa mga mitigating ug preparedness measures. (ECB/PIA7 Bohol)
