Ang pagsukong ito ay resulta ng walang tigil na operasyon ng kapulisan ng Sta. Elena at suporta ng taong bayan upang maipakita at mailatag ang mga programa at proyekto ng pamahalaan na nakahandang ipagkaloob sa kanya.

Isasailalim si Ka Carlo sa proseso upang mapabilang sa Enhanced Comprehensive Local Integration Program (ECLIP) na programa ng gobyerno upang mabigyan siya ng panibagong pagkakataon na mamuhay ng tahimik at payapa kasama ng kanyang pamilya.

Sa pamamagitan nito, siya ay mabibigyan ng mga ibat-ibang tulong, kaalaman at kasanayan na magagamit sa pagbabagong buhay.

Samantala, nagkaroon naman ng Press Conference na ginanap sa Municipal Hall ng Bayan ng Sta. Elena sa pangunguna nina Mayor Bernardina E. Borja, Vice Mayor Ryan Jeffrey T. Mendoza at mga miyembro ng Sangguniang Bayan (SB), kapulisan at ilang Media.

Nagpaalala si CNPPO Provincial Director PCol. Antonio C. Bilon Jr. sa mga taong nais magbalik-loob sa pamahalaan na huwag mag alinlangan na sumuko sapagkat buong puso silang tatanggapin at handang tulungan ng gobyerno.

Aniya, hinihikayat pa ng kapulisan ang mga natitirang miyembro ng NPA na sumuko na at mabigyan muli ng pagkakataon na magbagong buhay.

Kinilala ang rebelde na si Ka “Carlo”, 37 taong gulang, binata at residente ng bayan ng Sta. Elena, Camarines Norte.

Isinuko nito ang kanyang armas na isang kalibre 45 pistol na may brand name na M1911A1 U.S ARMY ACP, isang steel magazine na may pitong bala, isang granada, limang TNT (C4) na may brand name na NITRO EM 1500, 10 blasting cap fuse at detonating cord na may habang 10 metro.

Ang naturang rebelde ay miyembro ng Southern Tagalog Regional Party Committee (STRPC) na nagsasagawa ng mga operasyon sa Camarines Norte sa mga bayan ng Capalonga, South Road Barangays ng bayan ng Labo at Sta. Elena.

Itinalaga rin si Ka Carlo at nagsilbi bilang Vice Commanding Officer ng naturang grupo ng mahigit siyam na taon.

Hindi lamang ang mga sumuko kundi pati na rin ang kanilang pamilya upang makapagbagong buhay at makamit ang ganap na kapayapaan sa bansa.  (PIA5/Camarines Norte/ ulat mula sa tanggapan ng CNPPO)