TUBOD, Lanao del Norte (PIA)--Gipakusgan sa Department of Social Welfare and Development (DSWD)-10 ang paningkamot sa pagtabang sa mga indibidwal ug pamilya nga apektado sa krisis ug sa pandemya.

Pinaagi sa Assistance to Individuals in Crisis Situations (AICS) program sa ahensya, nakadawat og tag-P3,000 nga cash assistance ang kapin 3,000 ka benepisyaryo gikan sa Iligan City ug sa mga lungsod sa Tubod ug Lala sa Lanao del Norte province.

Matud ni DSWD-10 Social Welfare and Development Office Team Leader Raiz A. Ampaso, tumong sa AICS program nga matabangan ang mga nanginahanglan ilabi na ang naa sa ‘vulnerable’ nga mga sektor sa katilingban.

“Kini usa sa mga regular nga program sa DSWD isip pag-responde sa mga panginahanglan sa atong mga beneficiaries, labi na karon kay wala pa gani kaayo ta naka recover sa pandemic ug medyo nagtaas-taas napud ang presyo sa basic commodities,” sumala ni Ampaso.

Ang cash assistance program maoy nahimong lifeline sa daghang pamilya sa lugar, apil na ang tricycle driver nga si Predelito Labuana Alforque, kinsa nipadayag og pagpasalamat sa iyang nadawat nga tabang.

“Ipalit namo ug tambal. Makatabang lang gihapon ni sa amoa, kay ang uban pud ipalit namo ug bugas kay hinay man ang among pamasahero karon gumikan sa krisis. Nagpasalamat pud ko nga natagaan pud ko ug gamay nga ayuda. Kinahanglan man gyod pud nga matagaan mi kay dili man mi maka-bangon kay gagmay ra among kita,” sumala ni Alforque .

Sa laing bahin, si Romeo Pepito, kinsa naggamit og wheelchair alang sa paglihok, nalipay nga nakadawat sa iyang hinabang pinansyal. Uban sa allowance, makapalit na siya sa iyang mga panginahanglanon matag-adlaw.

Dugang pa niini, nagpasalamat usab si Mary Jane Econar, usa ka PWD, nga usa sa nakadawat ug tabang pinansyal.

Ang mga benepisyaryo gipili base sa screening ug assessment sa local government units. Ang DSWD nagpabiling komitado sa paghatag ug hinabang sa mga nanginahanglan, depende sa pundo.

Ang programa sa AICS usa ka testamento sa dili matarug nga pasalig sa ahensya sa pag-alagad sa mga panginahanglan sa vulnerable nga mga komunidad taliwala sa mga krisis ug katalagman.

Ang DSWD-10 mahinungdanong naningkamot sa pagtukod ug pagpalig-on balik sa komunidad sa probinsya.  (LELA/PIA-10/Lanao del Norte)