TUGUEGARAO CITY, Cagayan (PIA) - - Neanunsyo ni Tuguegarao Mayor Maila Ting-Que ta official Facebook Page na kagabi nga amungan na kanu ta P150,000 y cash reward para ta sinni nga makakoffun ta ketuppal na imbestigasyon ta kaso ni Jasmin Casale, 21-anyos nga residente na Barangay Atulayan Norte, nga yayya ay nalegan nga natay ta tadday nga lote ta Annafunan East kustu Mayo 23.

Segun kani Mayor Ting-Que, awayya nga magalan y Tuguegarao City Police Station ta 09058005118 onu yuri Facebook messenger mismu na alkalde meyannung ta imbestigasyon.

Negarantisa na gapa nga mabbalin ta confidential y identidad nuri informant.

Napollu nga nekagi ni Mayor Ting-Que kustu Mayo 24 nga mangiyawa  yayya ta P50,000 ta sinni laman nga makeyawa ta informasyon tapenu magafu yuri nagangwa turi nga krimen. 

Maraddaman nga nepalappa gapa na alkalde nga iddan na kanu ta balor yaw nga kaso megafu ta mepangngo nakwan nga mapya y seguridad na Tuguegarao City para ta residente na ira.

“We will not take this lightly considering that Tuguegarao City offers a safe and secure space for its residents, students, workers and visitors,” kunna ta official Facebook Page na.

Mayo 21 ay neposte na yena ni Casale nga si Riza Casale nga ari nga ma-kontak yuri ana na. Segun sa, nanaw yuri abbing ta alas siete ta gabi na Mayo 20. kabalin na ay ari kanu ngana maagalan yuri maginganay ta cellphone na.

Mayo 23 ay nasingan ngana laman yuri baggi na abbing ta tadday nga bakante nga lote ta Annafunan East, nga segun ta pulis, ay natay megafu ta pinaggal da kanu y karalong na. 

Megafu taw nga nessimmu, sinabarangngan ni Mayor Ting-Que y publiko nga magimmuguk ta mapia nu makiarubang ta estrangheru ira, anna mabbalin tu alerto para ta seguridad na siyudad. (JKC/PIA-2/Mayor Maila Ting Que FB page/PNP)