MANILA, November 13 (PIA) -- Gideklara ni Presidente Ferdinand Marcos Jr. isip Dekada sa Kasaysayan sa Pilipinas (Decade of Philippine History) ang tuig 2023 hangtod 2033.

Kini dungan sa pagsaulog sa National Historical Commission of the Philippines (NHCP) centennial anniversary sa Oktubre 2023.

Pinaagi sa Proclamation 386 nga gilagdaan ni Presidente Marcos niadtong Nobyembre 7, giingon nga ang tibuok nasud miduyog sa NHCP sa pagsaulog niining milestone sa burukrasya sa Pilipinas ug gihatagan og bili ang papel sa kasaysayan sa pagkatukod sa nasud.

Ubos sa maong proklamasyon, ang NHCO gimanduan sa pagpangulo, pagkooperar ug pagdumala sa pag-obserbar sa Dekada sa Kasaysayan sa Pilipinas ingon man ang pagladlad sa mga programa, proyekto ug mga kalihokan alang sa maong selebrasyon.

Ang tanang ahensya ug instrumentalidad sa gobyerno apil na ang government-owned or -controlled corporations, government financial institutions, state universities and colleges, local government units, non-government organizations ug pribadong sektor gidapit usab sa pagsuporta sa NHCP ug pag-apil sa pag-obserbar sa maong okasyon.

Ang NHCP gikatakdang magsaulog sa ika-100 nga anibersaryo sa pagkatukod niini sa Oktubre 23, 2033. (ECB/PIA7-Bohol)