TAGBILARAN CITY, Bohol (PIA) — Gihatud sa National Irrigation Administration 7 (NIA-7) ang 1,526 ka pakete sa hybrid nga mga binhion ngadto sa mga benepisyaryo sa Contract Farming niadtong Hunyo 6 sa NIA Capayas Irrigation System Office sa lungsod sa Ubay.
Kini kabahin sa mga paningkamot sa pagpalig-on sa produksiyon sa humay ug pagkab-ot sa seguridad sa pagkaon.
Ang nahisgutang mga binhi-on, maoy gipili tungod sa ilang taas nga potensyal sa abot, samtang ipang-apod-apod kini sa 284 ka mga farmer-contractees, kinsa una na nga nahatagan sa bansay sa hustong pagpatagod sa binhi.
Ang matag pakete, motimbang og 3 ka kilo, kauban sa umaabot nga 340 ka kilos nga inbred seeds nga igahin base sa gidak-on sa umahan ug piho nga mga panginahanglan, pagsiguro sa patas nga pag-apod-apod niini ngadto sa mga benepisyaryo sa lalawigan sa Bohol.
Kini nga mga binhi-on, kabahin sa P50,000 nga inisyal nga tabang matag ektarya alang niining panahona sa tingtanum ug abag sa produksiyon.
Uban usab niini nga aba gang mga abono, pestisidyo, fungicide, ameliorant sa yuta, ug suporta nga salapi.
Sa contract farming, sa higayon nga anihon na ang humay, bayran sa NIA ang mga mag-uuma og kwarta, tugbang sa aktuwal nga produksyon, o P50,000 nga maximum base sa gitarget nga 5 metriko tonelada sa presko nga humay matag ektarya.
Usa sa mga farmer-contractees, si Ines A. Quiachon, taga Talibon, nagpahayag sa iyang pasalamat sa inisyatiba sa NIA.
“Sa mga kadagkuan sa NIA, kang Administrator [Guillen], mapasalamaton ‘ming mga mag-uuma nga way ikagasto sa among basak, nga naa kamo naghuna-huna sa kaayohan namo– sa pagtabang namo sa among kalisod. Ang contract farming, niangay jud ko kay wa nami rason nga di mi ka production og dako kay wa mi ika-gasto,” matud pa ni Quiachon.
Ang nag-unang tumong sa Contract Farming Program mao ang pagpataas sa produksiyon sa humay ug pagsiguro sa kita sa mga mag-uuma pinaagi sa paghatag kanila sa gikinahanglang inputs ug tabang.
Atol sa paglagda sa memorandum of agreement tali sa mga mag-uuma ug NIA niadtong Mayo 30, gipasabot ni Bohol Integrated Irrigation System Head Engr. Evelina P. Putong nga ang NIA di lang motabang sa mga mag-uuma pinaagi sa irigasyon, apan karon nagtanyag na usab kini og pinansyal nga tabang aron masuportahan ang mga paningkamot sa agrikultura sa mga mag-uuma.
Ang NIA hugot nga magmonitor sa pag-uswag sa mga mag-uuma nga magamit niini nga mga binhi, uban ang regular nga check-in ug mga assessment aron masiguro nga ang mga tumong sa programa matuman. (ECB/PIA7-Bohol)
