TAGBILARAN CITY, Bohol, Feb. 3 (PIA) — Gitugyan sa National Irrigation Administration (NIA) Rehiyon 7 ang P4 milyones nga kantidad sa Pondol-Garcia Communal Irrigation Project ngadto sa mga mag-uuma sa Batuan niadtong Miyerkoles, Pebrero 1, 2023, sa Barangay Garcia, lungsod sa Batuan.
Gipondohan ubos sa Comprehensive Agrarian Reform Program (CARP), kini nga proyekto naglangkob sa duha ka intake gate, 6 turnouts, 3 ka thresher crossings, 3 drainage crossings, ug kapin sa usa ka libo ka metros nga irrigation canals.
Ang Pondol-Garcia CIP mohatag og irigasyon sa 8 ektarya nga umahan sa Batuan nga motabang sa 10 ka farmer-beneficiaries sa lokalidad.
Atol sa Inauguration ug Turnover ceremonies, si LGU Representative Municipal Councilor Segundo Bautista, Garcia Barangay Kapitan Flaviano Pacatang ug Irrigator’s Association President Melonie Baguio midawat sa symbolic turnover key gikan sa ahensya.
Si Pondol IA President Baguio mipadayag sa iyang pasalamat sa NIA atol sa iyang Acceptance Message.
“Salamat sa NIA kay naabot namo ni nga proyekto. Amo kining paga-ampingan ug limphoyan kanunay, matud pa Baguio.
Nitambong usab atol sa maong seremonyas sila Project-In-Charge sa NIA BCSIMO Bohol-Siquijor Office nga si Bienvenido T. Seroje, Senior IDO Joy Mendoza, ug ang gi-assign nga IDO Glenda C. Cario. (ECB/PIA7 Bohol)
