Si Bureau of Fire Protection (BFP) 7 Regional Chief of Staff, Fire Sr. Supt. Pedro G. Balatero Jr (2nd from right), inubanan sa mga opisyales sa BFP fire stations sa Cebu, misaysay sa mga aktibidad sa ilang ahensya subay sa pag-obserbar sa ‘Fire Prevention Month’, atol sa ‘Kapihan sa PIA’ program niadtong Marso 5 sa PIA Regional Office 7 sa Cebu City. (JAT/PIA7 Cebu)
CEBU CITY, Cebu (PIA) – Ang Bureau of Fire Protection Region 7 (BFP7) mitaho nga mius-os ang mga insidente sa sunog nga natala sa Central Visayas karong tuiga itandi sa mga miaging tuig ug kini resulta sa subsob nga pagpatuman sa mga nagkadaiyang aktibidad nga nag-edukar ug nagbansay sa komunidad ug mga mga kabarangayan bahin sa saktong mga pamaagi sa paglikay sa sunog.
Sa gipahigayon nga ‘Kapihan sa PIA’ program niadtong Marso 5 sa Cebu City, ang BFP7 miingon nga aduna nay natala nga 224 ka insidente sa sunog sa tibuok rehiyon gikan sa buwan sa Enero hangtod sa Marso karong tuiga og kini mas gamay ikomparar sa natala nga mga sunog sa susamang mga buwan sa tuig 2024 kung diin adunay nahitabong 506 ka sunog ug 270 usab niadtong 2023.
“We have a decreased number of fire incidents in 2025 this is because we keep on instilling to our community the importance of fire prevention, ang focus sa BFP is to empower the community, enhance the awareness and educate the community sa paglikay sa sunog,” sigon ni BFP7 regional chief of staff, Fire Supt. Pedro G. Balatero Jr., atol sa nahisgotang programa.
“Gitudloan usab natu sila sa paghimu ug pagpraktis sa escape plan, gi edukar sa mga saktong cooking practices, ug saktong pag-ila sa mga hazardous materials sa mga kabalayan nga importante kaayo mahibaw-an sa matag pamilya aron makalikay sa insidente sa sunog,” dugang ni Balatero.
Sa probinsya sa Cebu, adunay nay natala nga 125 nga insidente sa sunog karong tuiga nga miresulta ug P285 milyon nga kinatibuk-ang danyos.
Dugang usab sa Cebu City Fire Station, nga aduna nay natala nga 60 ka mga insidente sa sunog sa Cebu City sukad sa pagsugod sa 2025, ug 7 niini nahitabo sa buwan sa Marso nga miresulta usab sa P4.4 milyon nga danyos.
Sa pagus-os sa mga insidente sa sunog sa tibuok rehiyon, sigon sa BFP7 nga padayun nilang pahingusgan ang pagpatuman sa mga fire prevention activities ilabi na sa pagpaduol niini ngadto mismo sa komunidad ug mga kabalayan nga matod nila usa ka epektibong estratehiya sa kampanya pagbatok sa sunog.
Subay usab sa pag-obserbar sa ‘Fire Prevention Month’, gipahimug-atan usab sa ahensya ang importansya sa kolaborasyon ug pagtinabangay sa tanang sektor ug ang partisipasyon sa komunidad alang sa pagsugpo ug paglikay sa mga insidente sa sunog.
“Sa fire prevention, dili lang kami sa BFP ang maningkamot but all sectors kinahanglan magtinabangay ilabi na gyud ang pinakaimportante ang papel sa atong komunidad aron natu makab-ot ang tinguha nga kitang tanan dili mabiktima sa sunog,” batbat ni Fire Senior Supt. Manases G. Baustista, ang provincial fire marshal sa BFP Cebu province. (RGC/PIA7 Cebu)
