SYUDAD SANG ILOILO (PIA) — Ginbuksan sang National Museum of the Philippines (NMP)-Iloilo ang ila duha ka bag-o nga art galleries sang Disyembre 13, 2024, nga naghatag sa mga Ilonggo sang dugang nga kaladtuan, ilabi na subong nga panahon sang paskwa.
Ang duha ka bag-o nga mga galeriya amo ang Fine Arts and Archaeology, nga nagapakita sang eksibit, Halangdon: Ang Arte ni J. (Jeremias) Elizalde Navarro; kag ang Maritime and Underwater Archaeology nga nagapresentar sang Dumaan nga Pagpangabuhi sa Panay: Subsistence, Trade, and Funerary Practices.
Si J. Elizalde Navarro isa ka National Artist gikan sa San Jose de Buenavista, Antique nga nagagamit sang oil, acrylic, watercolor, metal, wood, kag print sa iya artworks. Ang iya artworks nagalakip sang abstract kag figurative paintings, sculptures kag assemblages
Ang Dumaan nga Pagpangabúhi sa Panay: Subsistence, Trade, and Funerary Practices exhibition, sa pihak nga bahin, magadala sa mga bisita sa prehistoric past sang Isla sang Panay.
Halin sang Late Pleistocene tubtob sa ika-18 nga siglo nga kinaandan nga panahon (CE), ang eksibit nagapakita sang mga artifact kag iban pa nga mga arkeolohiko nga natukiban sa rehiyon, nga nagapakita sang nagabag-o nga estilo sang pagkabuhi sang dumaan nga mga pumuluyo sang isla.
Ang exhibit nagapasanyog sang mas madalum nga paghangop kag pag-apresyar sang lokal nga arkeolohiko nga palanublion kag nagapauswag sang ihibalo sang publiko sa madalom nga maragtas sang Isla sang Panay.
Bukas ang NMP-Iloilo halin alas nuwebe sa aga tubtob alas singko sa hapon kag waay sang bayad. (AAL/JNH/PIA Iloilo)
